Коллегиянь промксонть панжомсто, Следственной управлениянь руководителесь Олег Коробов тешкстызе, зярыя иетнень перть республикасонть ванстови чавоматнень, нарьгамотнень ды шумбрачинтень покш зыянонь кандоматнень, конат ветясть куломатнес, панжомань 100% невтемась. 2022 иестэ республикава Следственной управлениясь тевдеемань прявт енкстнэнь коряс сайсь 5-це тарка РФ-нь регионтнэнь ютксо, конат совить ПФО-нь.
Следственной комитетэнтень явови башка тарка коррупциянть ды налогонь преступлениятнень каршо бороцямосонть. Мелят следственной управлениянь сотрудниктне истят уголовной тевтнень коряс велявтовсть 500 млн ламо целковойть. Мордовиянь Прявтось тешкстызе, республикань правительствась народно-хозяйственной тевдееманть лувсо свалшкане вастови ютазь иетнестэ топавтозь экономической преступлениятнень аволь вадря тевкадовкстнэнь марто. Неть преступлениятне аволь чуросто аштить пирявксокс неень правительстванть важодемасо. «Невтемакс, зярдо банконтень залогс максыть социальной учреждениятнень, а миненек эряви путомс тов инвестицият федеральной средстватнень эйстэ. Истят преступлениятнень панжомань коряс важодемась пек эряви, карматано сонзэ поладомо следственной органтнэнь марто вейсэ. Эряви бажамс топавтомс емавкстнэнь пандовтоманть, конат кандозь экономической ды коррупционной преступлениятнень вельде, пандовтомс сынст судто икеле», – тешкстызе Артём Здунов.
Мордовиянь Прявтось явсь мель республикасонть, кода весе масторонть келес, киберпреступлениятнень касоманть лангс. «Меельце иетнестэ те енксось кармась сехте стакатнестэ вейкекс. Каявоматне ютыть аволь ялгаксчинь мастортнэстэ, истя жо тевдеемаст эрязасто топавтыть мошенниктне, конат бажить совамс минек эрицятнень зепес», – мерсь Мордовиянь Прявтось. Мордовиянь госуниверситетэнь специалисттнэнень ули максозь кармавтома анокстамс профилактикань продуктт истят преступлениятнень а нолдамонть коряс, мельсэ эряви кирдемс следственной органтнэнь практикатнень.
Артём Здунов евтась сюкпря следственной управлениянь сотрудниктненень социальной эрявикс енкстнэсэ эрицятнень мелест-ванновтост ванстоманть марто сюлмавозь кевкстематнень куроксто редямонть кисэ.
«Тынк марто вейсэ минь карминек витеме зарплататнень коряс кевкстематнень, истя жо удалась пандовтомс долктнень, конат таштавсть ламо иеть».
Те иентень прявт тевтнень ютксо Мордовиянь Прявтось истя жо евтызе уроз-эйкакштненень эрямонь таркатнень максоманть. «Ризксэс, «тевкадовксокс» миненек сатотсь эрямонь таркатнень лангс очередэсь, конась пурнавсь икеле иетнестэ, 1,5 тежат урозт, конатненень миненек эряви максомс квартират», – тешкстызе Артём Здунов.
Сон истя жо кармавтсь вейсэндямс вийтнень эйкакштнень сэтьмечист топавтоманть коряс. «Миненек вейсэ эряви виевгавтомс важодеманть преступной каявоматнень эйстэ кевгавксово иеде седе вишкинетнень ванстоманть ды преступностень профилактиканть коряс».
Мордовиянь Прявтось евтась сюкпря руководствантень ды сотрудниктненень лезэнь кандыця вейсэнь важодеманть кисэ, сень мельсэ кирдезь, мелят савсь витемс од тевть – топавтомс частичной мобилизациянь ютавтомань законностенть, кемекстамс военнослужащейтненень ды сынст семиятненень лездамонь од тевтнень, виевгавтомс антитеррористической ванстоманть ды региононь весе службатнень анокчинть.
«Кеман, седе товгак минь вейсэ карматано топавтомо тевтнень, конатнень путынзе Россиянь Федерациянь Президентэсь В. В. Путин, ванстомо минек республикасо порядоконть ды сэтьмечинть», – мерсь Артём Здунов.
Мордовия Республикань Прявтонь пресс-службась