Мордовиянь Прявтонь тевтнень топавтыцясь Артём Здунов эйзюрковонь 25-це чистэ видеоконференциянть вельде ютавтсь республикань антинаркотической комиссиянь промкс. Ваннозь наркоманиянь профилактикань кевкстематне.
Тешкстазель, неень шкане республикасонть тевтне тень коряс талновтыцят. Мордовиянь Прявтонь тевтнень топавтыцясь ледстизе, Россиянь Президентэнть Владимир Путинэнь Указонзо коряс кемекстазь 2030 иенть видьс Россиянь Федерациянь государственной антинаркотической политикань Стратегиясь, конань коряс регионсонть эряви топавтомс наркотиктнень аволь закононь коряс оборотонь анолдамонть ды наркоманиянь профилактиканть коряс зярыя тевть. Республикань руководителесь тешкстызе: «Эряви виевстэ важодемс профилактиканть коряс! Ды куроксто кемекстамс тевть од ломантнень те зыяндонть ванстомга».
Артём Здунов тешкстызе, наркоманиянь профилактикасонть покш талика саи спортось. Бути эйкакштне ды од ломантне явить мель спортонтень, якить эрьва кодат турнирс, те кармавты сынст ветямс эрямонь шумбра лув, ванстомс прянть зыянтнэде. Мордовиянь Минспортонть пачтямонзо коряс, республикасонть физкультурантень ды спортонтень свалшкане явить мель эрицятнень 88%. 2020 иестэнть од ломанень государственной политиканть коряс ютавтозь малав 2 тёжа мероприятият, конатнесэ примасть участия 200 тёжадо ламо ломанть. Те важодеманть эряви поладомс, кода тешкстызе республикань руководителесь, - эряви виевгавтомс ванноманть покштнень, истя жо тонавтыцятнень ды тренертнэнь пельде эйкакштнень ды од ломантнень мельга.
Промкссонть истя жо ваннозь кевкстематне, конат сюлмавозь аволь государственной организациятнень тевдеемаст марто, конат топавтыть сеть лицятнень реабилитациянть, конат нолдыть тевс наркотикень веществатнень.
Мордовия Республикань Прявтонть пресс-службась