Ледстясынек, од изобретателенть важодевксэзэ тешкстазь Евразийской патентэнь ведомствань медальсэнть, сонзэ казизь чадыковонь 15-це чистэнть Саранскойсэ Федеральной Собраниянь Федерациянь Советэнь Председателенть пингстэ интеллектуальной ули-паронь кевкстематнень коряс Советэнь выездной промксонть лувсо.
«Артём Сергеевич, тынь содатадо, Мордовиясо ней эрязасто виевгавтови те темась, – пшкадсь Мордовиянь Прявтось школасо тонавтницянтень. – Ды монень пек мельспаро, зярдо интеллектуальной ули-паронь виевгавтомань коряс минек коллегатне тешкстыдизь тынк ды казсть награда. Секскак монь ульнесь мелем вастовомс мартонк».
Артём Суринэнь теевксэзэ – те ушодыця сноубордисттнэнь тонавтоманть туртов, истя жо инвалидтнэнь реабилитациянть туртов ламо функциянь тренажёрось. Сонзэ эрявиксчиденть од изобретателесь соды эсензэ опытэнзэ коряс – Артём яви мель спортонь эрьва кодат видтнэнень, истя жо сноубордонтень.
«Мон ваннынь-тонавтнинь истят тренажеронь эрьва кодат конструкцият, ансяк монь теевксэсь – лиятнень енов а молиця, секс мекс истят мон зярдояк эзинь вастне», – тешкстызе школасо тонавтницясь.
Мордовиянь Прявтось покш мель марто кортась од рационализаторонть марто тренажеронть седе тов вадрялгавтомань кевкстематнеде, спортонь эрьва кодат видтнэсэ сонзэ тевс нолдамодонть – фигурной кирякстнемасонть, хоккейсэнть ды, нама, пандонь сокстнэсэ. Республикань руководителесь ледстизе, Мордовиясо Отяжбуень енкссо виевгавтови пандосто кирякстнемань комплексэсь, ды Артёмонь теевксэнть мереви нолдамс тевс пандосто сокссо ушодыця кирякстницятненень.
«Сонзэ эйсэ мереви тонавтнемс одтнэненьгак, пенсионертнэненьгак. Сонзэ вельде минь куш кона ломаненть путсынек сокстнэнь лангс. Ды а эряви ардомс кие соды ков, пандомс покш ярмакт», – мерсь республикань Прявтось.
Вастовомастонть ульнесть МР-нь Промышленностень, наукань ды од технологиятнень министрась Игорь Губайдуллин ды Н. П. Огарев лемсэ МГУ-нь проректорось Александр Давыдкин.
Артём Здунов кармавтсь министрантень явомс школасо тонавтницянтень весемеендонь лезкс интеллектуальной ули-паронть лангс праватнень регистрациясонть, истя жо грантонь лезксэнть вельде те темань седе тов виевгавтомасонть.
Теде башка, Мордовиянь Прявтось явсь покш мель эште вейке проектэнтень, конасонть ули Артём Суринэнь таликазо. Те проектэнтень истя жо максозь пелькстамонь Гран-прись. Те 43№ лицейсэнть Владимир Сущинский фронтонь кинооператоронть музеесь. Музеень од пространствась ды музеень сайтонь теемась лездыть явовтомс мель Саранскойсэ чачозентень, конась чавовсь 1945 иень даволковсто Бреслау ошонть ало тюремасонть, кедьсэнзэ ульнесь камера.
Мордовиянь Прявтось тешкстызе героической кинооператоронть коряс ледстнематнень ванстомань эрявиксчинть ды макссь зярыя кармавтомат республикань Правительствантень школань музеень виевгавтоманть коряс.
Мордовия Республикань Прявтонь пресс-службась