Аштемковонь 5-це чистэ Петербургонь раськеютконь форумсонть сессиятнестэ вейкесь алтазель ПФКИ-нь тевдеемантень - грантонь лезксэнть эйстэ креативной индустриятнесэ свалшкань полавтоматнес. Сонзэ важодемасо ульнесь Мордовиянь Прявтось Артём Здунов.
Культурань ушодкстнэнь Президентэнь фондонь генеральной прявтось Роман Карманов тешкстызе: Фондонть теемадонзо мейле ютасть уш 16 яволявтомань кампаният, конатнень лувсо максозь малав 130 тёжат яволявтомат. Лезкс явозь 12 тёжат проекттнэнень – те малав 50 млрд целковойть. Прявтось, зняро жо путсть субъекттнэ ды грантонь получицятне софинансированиянь условиятнень коряс. Текень пингстэ гранттнэнь покш пельксэсь тусь регионтнэс.
Тешкстазель: те шканть перть мельтненень-арсематненень точкань кирдемаст кассь свалшкань важодемакс, масторсонть появась ды виевгады креативной сообществась.
Мордовиясь - ПФКИ-нь яволявтомань кампаниятнень ероков участник ды культурань, искусствань ды креативной индустриятнень коряс федеральной лезксэнь явомань коряс лидертнэнь ютксо. Вете иетнень перть республиканть пельде максозь малав 1200 яволявтомат, 150-тненень – явозь лезкс малав 466 млн целковойтнень покшолмасо.
Мордовиянь Прявтось тешкстызе, республикасонть культурантень ломантнень мелень явоманть улить кавто пельксэнзэ: Фондонть марто важодеманть ушодовомадо икеле ды мейле. Раськень культурань койтнень ванстозь Мордовиянь од чачось тееви ПФКИ-нть лезксэнзэ вельде. Ветяви эрзянь ды мокшонь раськетнень сюпавчист цифровкась. Истя чачсь модань коряс культурань покш проект – «Варма»этно-арт-театрась.
2025 иестэ Мордовиясь кармась субъекттнэстэ вейкекс, косо кармась важодеме ПФКИ-нь региононь проектэнь офисэсь. Ней весе масторонть келес эйстэст уш 37. Проектэнь офисэнь панжомась лездась редявикстэ кастомс региононь цетавкстнэнь.
«Мон арсян, ламочись свал юты вадрячинтень, - мерсь Артём Здунов. - Ансяк появась Фондось, минь карминек кучнеме тов яволявтоманок ды получинек профессиональной вадря урок. Ней минек ули куншкакуро, конась лезды анокстамс яволявтомат, ды мон ёвтан сюкпря Фондонтень, минь саинек ёрокчи грантонь получамонть лангс яволявтоматнень сёрмадомасо».
Сехте редявикс проекттнэнь ютксо, конатненень явозь лезкс Культурань ушодкстнэнь Президентэнь фондонть пельде ды конат кармасть тешксэкс Мордовиянть туртов, «Голос героев» народной премиясь, «Эрьзя: новое измерение» мультимедийной проектэсь, «Школа Бабы-Яги» семиянь кинопроектэсь, «Мы вместе!» раськень культуратнень весероссиянь од ломанень фестивалесь, «Сурский рубеж» мемориалонь Тремасов ды ламот лият.
Те рядсонть башкакс ашти «Тайна адмирала Ушакова» художественной фильмань теемась - 1953 иестэнть саезь апак изняво флотоводецэнть коряс васенце полнометражной картинась. Тедеде Мордовиясь ды весе масторось тешкстыть Иневанькс праведной воинэнть Феодор Ушаковонь канонизациянь 25 иетнень.
«Те аволь уле Культурань ушодкстнэнь Фондтомо, - тешкстызе Артём Здунов. - Сюкпря сень кисэ: Мордовиясо эрязасто виевгавтовить креативной индустриятне, сюкпря Артистэнь кудонть, музыкань класстнэнь, од ломанень театранть кисэ. Истят институттнэнь улемстэ минь тейтяно овсе лия - неень шкань, мельстуиця Мордовия!»
Прявт проекттнэстэ вейкесь, конань ней республикань командась топавты Культурань ушодкстнэнь Президентэнь фондонть марто вейсэ – «Семейная столица России» весероссиянь пелькстамонь ютавтомась. Проектэнть ушодызе РФ-нь Госсоветэнь «Семья» ёнксонть коряс комиссиясь, конань прявтсо Артём Здунов. Сон аравтозь ламо эйкакшонь трямонтень лездамонтень ды семиянь лангс нежедиця региононь сехте вадря практикатнень шаштомантень.
Мордовия Республикань Прявтонь Пресс-службась