Ледстясынек, тедеде форумсонть невтезь республикань 20 компаниятнень продукциясь. Мордовиянь стендэнть ваннызе Россиянь Правительствань Председателень Полавтыцясь Марат Хуснуллин. Вице-премьерэнтень невтизь региононь предприятиятнень продукциянть. Важодемань вастовомасонть Артем Здунов ды Марат Хуснуллин кортасть республикань производительтнень туртов миемань рынкатнеде, истя жо инфраструктурань проекттнэнь топавтомадост.
«Минек улить зярыя объектт, конатнень строямс явозь федеральной ярмакт – те Ковылкина ошсо путепроводось ды федеральной смустень зярыя кить, – евтнесь Мордовиянь Прявтось. – Кортамось истя жо мольсь республикань китнень сетень кирдеманть лангс башка ярмактнень явовтомадост. Мордовиясь зярыя объекттнэнь коряс совать кото иетнес, конань кемекстызе Россиянь Правительствась. Нейтяно кирдема!»
Лезэв, республикань руководителенть ванновтозо коряс, «КАМАЗ» ПАО-нь генеральной прявтонть Сергей Когогин марто вастовомась. Автоконцернась – региононь кемевикс партнёр. Те вейсэнь тевдеемась ули келейгавтозь, истя жо общественной транспортонь парконь одкстомтоманть лувсо.
Республикань Прявтось башка тешкстызе, 2024 иестэ Мордовиянть исламонь мастортнэнь марто товарооборотось кассь 83%. «Ансяк резервась покш. Минь лисинек СНГ-нь мастортнэнь томбалев, ней важодтяно Турциянть, Вейсэндязь Арабской Эмираттнэнь, Египетэнть, Саудовской Аравиянть марто. Минек внешней микшнемань оборотонь 47% – исламонь мастортнэ. Секскак поладтано важодеме. Сюкпря Татарстанонтень лембе вастоманть кисэ – Мордовия Республикась ашти сехте вадря таркасонть, совамсто, ваксканзо а ютават. Сюкпря весенень, кие примась участия», – мерсь Артём Здунов.
Мордовия Республикань Прявтонь Пресс-службась