Чадыковонь 17-це чистэ Саранскоень экопарксо валске марто ульнесть ламо ломанть - республикань од ломанень общественной организациятне лиссть субботникс. Ошонь те пиже тарканть ванськавтомадо меленть евтызе «Зелёный мир» эйкакшонь экологиянь организациясь, сынь тердизь Мордовиянь Прявтонть тевтнень топавтыцянть Артём Здуновонь вейсэндявомс сынст акциянтень. Республикань руководителесь тердеманть саизе ды Республикань Кудосо валске ютавтозь промкстнэде мейле полавтынзе оршамопелензэ ды сась экопарков.
Россиянь школасо тонавтницятнень движениянь, студентэнь отрядонь представительтне, волонтертнэ - весе вейсэ зярыя часонь перть ванськавтызь-мазылгавтызь те тарканть, конась вечкеви ламот эрицятненень. Ней тесэ ков седе вадря чийнемс валске ланга эли якамс чокшне - ванькс, мазый экопаркось кенярдовты сельметь.
Мордовия Республикань Прявтонть пресс-службась