Чадыковонь 9-це чистэ Мордовиянь Прявтонь тевтнень топавтыцясь Артём Здунов ульнесь регионъютконь строямонь конференциясонть, конась вейсэндязель республикань строямонь, транспортонь ды китнень хозяйствань министерствань коллегиянть марто. Кортамосонть примасть участия Россиянь Федерациянь строямонь ды жилищно-коммунальной хозяйствань министрань полавтыцясь Дмитрий Волков ды властень федеральной органтнэнь представительтне.
Промксонть панжомадонзо икеле Артём Здунов коллегатнень марто ваннызе республикань предприятиятнень выставканть. Конференциянь участниктне ёвтнесть продукциядонть. Ламось нолдави тевс федеральной уровнянь стройкатнесэ.
Артём Здунов ёвтась сюкпря федеральной коллегатненень регионъютконь строямонь конференциянтень мелень явоманть кисэ. Прявтонь тевтнень топавтыцясь тешкстынзе регионсонть отраслянь прявт стакачитнень, вейкесь юткстост – кадратнень асатомась. «Минек а сатыть кадранок проектированиянь ды экспертизань коряс. Тень кисэ кувалгавтовить строямонь шкатне, ламонть сави теемс одс, ютамс комиссият. Весе те питней. Бути минь муйтянок ки МР-со проектэнь институтонть тееманть туртов эли муеви вадря партнер, сестэ регионось теи виев эскелькс строямонь сферасонть», - тешкстызе МР-нь Прявтонь тевтнень топавтыцясь.
Омбоце прявт кевкстемакс Артём Здунов ёвтынзе апак прядо объекттнэнь ды башка лоткась Тёжа иень площадьсэнть Универсальной залонть лангс. Региононь руководителесь мерсь, сонзэ эряви строямс неень шкань технологиятнень тевс нолдазь. Универсальной залось сатозо ламо иес. Истя жо кепедезель кевкстемась строямонь ды ЖКХ-нь ёнкссонть местной производительтненень лезксэнь явомадонть. Промышленной кооперациянь системанть виевгавтомадо кармавтомась уш максозь кавто министерстватненень: МР-нь экономикань, микшнемань ды предпринимательствань, истя жо промышленностень, наукань ды од технологиятнень. Региононть маласо шкантень покш арсеманзо. «Ули меленек неемс результатт. Строямо карматанок ламо. Минь строямонь коряс нацпроекттнэнь эряза участникть. Аволь ансяк строямонь организациятне, истя жо строямонь материалтнэнь промышленностесь муезэ тарка сы шкань проекттнэсэ», - яволявтсь Артём Здунов.
МР-нь Правительствань председателень полавтыцянь, строямонь, транспортонь ды китнень хозяйствань министрань тевтнень топавтыцясь Виктор Цыганов пачтясь, апак вано COVID-19 пандемиянть лангс, Мордовиясь эзинзе лоткавто строямонь-монтажонь тевтнень, топавтовсть санитарно-эпидемиологиянь весе вешематнень. 2020 иестэнть строязь 70 производственной ды социальной объектт: 6 эйдень кужот, 2 школат, социальной обслуживаниянь 4 объектт, культурань 3 объектт. Истя жо строязь автомобилень кить ды путепроводт, производственной 11 объектт, полициянь отдел, микшнемань ды инфраструктурань объектт. Республиканть келес строязь эрямо таркань 324,5 кавонзазь метрат, те 101,1% 2020 иень аравтлувонь невтевксэнть коряс.
Те иень панжиковсто республикань законодательствантень совавтозь полавтомат, конат лездыть туемс таркань-таркань строямонть эйстэ ды ушодомс нолдамо тевс таркатнень комплексной виевгавтомань механизматнень. Кочказь прявт таркатне – 1 млн ламо кавонзазь метрат. Течинь чине стявтови ламо квартирань 51 кудо, вейсэнь покшолмасо 230,1 кавонзазь метрат, строить 24 застройщикть.
«6,5% льготань ипотеканть» вельде 2020 иестэнть республикасонть апак мие анок эрямо таркатне киртявсь колмоксть. Весемезэ 2020 иестэнть кредитэнь организациятне макссть ипотекань эрямо таркань 7818 кредитт, весемезэ 16 865,0 млн целковойть – те 139,5% икеле иень теке шкантень.
Республикань бюджетэнь ярмактнень вельде 6545 семиятненень явозь лезкс государстванть пельде ипотекань кредиттнэнь коряс процентэнь ставкань пельксэнть велявтоманть, истя жо ипотекань эрямо таркань кредитэнь пельксэнть эли целанек пекстамонть коряс. Финансированиянь покшолмась кармась 333,9 млн целковойть.
Эрямо таркатнень строямонтень лездамонть туртов Россиянь Минстроесь 2021-2024 иетнес федеральной бюджетстэнть яви республикантень субсидият 2 792 580,1 тёжат целковоень покшолмасо Саранск ошсо ды республикань муниципальной районтнэсэ 30 объекттнэнь топавтомс. Неть ярмактнень лангс строяви эйдень кужо, инженерэнь сетень 136 вайгельбеть, истя жо куротнень транспортонь инфраструктурань 93 вайгельбеть.
Анокстазь ды кемекстазь апак прядо объекттнэнь киртямонь аравтлув. Социальной инфраструктурань 6 объекттнэ улить максозь 2021-2022 иетнестэ.
Мордовия Республикань Прявтонть пресс-службась