Якшамковонь 13-це чистэ Республикань Кудонь Покш залсонть ютавтовсь кенярксчинь промкс, конась алтазель Россиянь печатень чинтень. Республикань журналисттнэнень поздоровт ёвтась Мордовиянь Прявтонь тевтнень топавтыцясь Артём Здунов. Региононь руководителесь тешкстызе СМИ-нь таликаст обществанть эрямосо, мерсь, журналисттнэнь професиональной тевдеемаст лезды властентень редямс ды витемс пшти стакачитнень, теи путовкс республикань виевгавтомантень.
Тедеде кенярксчинь вастовомась ушодовсь аволь поздоровтнестэ, а нусманя валтнэстэ: Артём Алексеевич ледстизе, 2020 иестэнть эрямостонть тусть республикань зярыя содавикс журналистт ды ветерант. Печатень чинть каршо лоткась чавомо седеезэ «Чилисема» журналонь прявт редакторонть, Мордовиянь Писателень вейсэндявксонь правлениянь председателенть Николай Ишуткинэнь. Сынст валдо лемест ледстязельть чатьмонемань минутасо.
Ютазь иестэ, кода тешкстызе Артём Здунов, республикань СМИ-тне явсть покш мель коронавирусонь пандемиянтень, истя жо ламо сёрмадсть ды ёвтнесть Ине Изнямонь 75 иетнеде. Те иень важодемань прявт ёнксокс Мордовиянь Прявтонь тевтнень топавтыцясь ёвтызе од ломантень марто важодеманть, истя жо антинаркотической пропаганданть коряс, ЖКХ-со стакачитнень невтемась – тень пингстэ Артём Алексеевич кармавтсь журналисттнэнень тесэ важодемс седе эрязасто, лисемс критика марто, мезесь карми властень весе уровнятнень туртов тердемакс – мезенть лангс явомс мель.
Мордовиянь Прявтонь тевтнень топавтыцясь истя жо тешкстызе межконфессиональной отношениятнень, истя жо республикань кадрань обеспечениянь кевкстематнень невтемань эрявиксчинть. «Тынь содатадо, минек яволявтозь кадрань пелькстамо, сон карми аштеме зярыя пельксстэ. Прявтось, сон келейстэ улезэ невтезь СМИ-сэ», - тешкстызе Артём Алексеевич.
Мордовиянь Прявтонь тевтнень топавтыцясь ёвтась мель: вастневемс журналисттнэнь марто свалшкане ды ёвтнемс вейке-вейкенень кулятнень, кортамс республиканть туртов талновтыця кевкстематнень коряс.
Профессиональной кенярксчинть кувалма явшевсть государственной наградат, казевсть Мордовия Республикань Прявтонь журналисттнэнь пелькстамонь изницятне.
Мордовия Республикань Прявтонть пресс-службась