Мордовиянь Прявтонь тевтнень топавтыцясь Артём Здунов якшамковонь 13-це чистэ ютавтсь коронавирусонь инфекциянь профилактикань ды седе тов а нолдамонь коряс оперативной штабонь промкс. Кортамось мольсь эпидемиологиянь тевтнеде, региононь шумбрачинь ванстомань системанть важодемадонзо, СOVID-19 каршо ливксэнть путомадо, истя жо санитарно-эпидемиологической вешематнень топавтоманть мельга ваномадонть.
Республикань Прявтонь тевтнень топавтыцясь тешкстызе, регионсонть коронавирусонь коряс тевтне аштить ванновт ало, яла теке кадовить талновтыцякс: «Шумбрачинь ванстомань системась полады важодеме покш нагрузка марто, - мерсь Артём Алексеевич. – Секскак пшкадян муниципальной образованиянь прявттнэнень: миненек эряви аволь ансяк явомс лезкс, истя жо ванномс-арсемс весементь – те лезды сы шкасто шождалгавтомс шумбрачинь ванстомань системань важодеманть».
Республикань руководителесь башка тешкстызе зярыя ёнкстнэнь эрявиксчинть: больницятнесэ чаво таратнень улемась, лекарстватнень пачтямось, тестированиянь ютавтомась ды коронавирусонть каршо ливкстнэнь путомась.
Республикань Правительствань Председателень полавтыцясь Галина Лотванова пачтясь, кода ютасть Од иень оймсема читне. Шумбрачинь ванстомань ды социальной сферань объекттнэсэ апак учонь зыянов тевть апак редя, текень пингстэ медицинань лезксэнь куроксто явомань службань тердематне якшамковонь 1-10-це читнестэ ютазь иень теке шканть коряс ламолгадсть 3%. Томбавоматне киртявсть 37%, ансяк томбавоматнень кувалма куломатне ламолгадсть.
«53 ломанть томбавсть ушосо, ламот – пандосто кирякстнемстэ, - мерсь Галина Лотванова. – Пшкадян райононь прявттнэнень явомс тень лангс башка мель ды ванномс сеть таркатнень, косто кирякстнить эйкакштне. Пандотнень, конат а ладить сэтьмечинь вешематненень, эряви пекстамс».
Республикань Прявтонь тевтнень топавтыцясь тешкстызе, те кевкстемась пек эрявикс, ды кармавтсь муниципальной образованиянь прявттнэнень пек ответственно топавтомс те тевенть: «Кирякстнемань аволь санкционированной неть таркатнень тынь содасынк. Путодо пирявкст, кортадо ломантнень марто, толковадо тенст. Илядо нолда истят зянов тевть!»
Теде башка, Артём Алексеевич явсь мель конькасо кирякстнемань таркатнень лангс. Пек берянь, эень площадкадонть башка, ломантнень туртов тосо мезеяк а тееви. «Районтнэсэ стака теемс пси чайде симема таркат? – кевксть республикань руководителесь. – Ушосонть аволь панжиков. Лисни, минь ардтнетянок ваннома марто – тосо весемесь ули, лия катоктнесэ – арась. Вана тынь, кить аштить залсонть, - ардтнеде катоктнева ды ваннынк. Те эдь шожда: теемс чай, кайсема-оршнема, конькань костямо таркат. Эряви тень теемс вадрясто!»
Мезе токши коронавирусонть, кенярексчитнестэ республикань лецямонь учреждениятнесэ чаво таркатне эзть ульне 20% аламо. Неень шкане ковидэнь госпитальтнесэ 30% чаво таркат. Тешкстазель, республикась лиси платос, ды прявтось ней – ванстомс неть тевтнень, тень туртов эряви пштилгавтомс санитарной сэтьмечинь вешематнень топавтоманть ды кирдемс кевкстеманть ванновт ало.
Ушодовсь коронавирусонть каршо ливксэнь путомась: якшамковонь 13-це чинтень республикав пачтязь вакцинань 2742 дозат, сы недлястонть учовить эштё 11 100 дозат – те лезды ушодомс ливксэнь путоманть здравоохранениянь, образованиянь, социальной обслуживаниянь, ламо функциянь куншкакуронь важодицятненень, социальной обслуживаниянь учреждениятнесэ эрицятненень, лексемань, седеень-санонь системань орматнесэ, сахаронь диабетсэ ды эчкелгадомасо сэредицятненень. Кода тешкстызе республикань здравоохранениянь министрась Олег Маркин, ливксэнть путыть лецямонь 23 учреждениятнесэ, тосо ули эрявикс весе оборудованиясь.
Штабонь промкссонть ваннозельть лия кевкстематкак. Истя жо кортамось мольсь Крештениясто экшелямотнеде – тесэ эряви топавтомс санитарной сэтьмечинь весе вешематнень. Кода тешкстызе Мордовиянь Прявтонь тевтнень топавтыцясь, тень эйстэ ашти ломантнень шумбрачист.
Мордовия Республикань Прявтонть пресс-службась