Мордовиянь Прявтонь тевтнень топавтыцясь Артём Здунов эйзюрковонь 23-це чистэ Ромодановань ёнкссо важодемань коряс улемстэ якась райцентрасонть Эень дворецэнтень, ваннызе, кодат условият теезь спортсментнэнь туртов. МР-нь спортонь, туризмань ды од ломантнень политикань министрась Александр Савилов ёвтнесь региононь руководителентень, эень дворецэсь эрязасто нолдави тевс, тей сакшныть шайба марто хоккеень коряс СДЮСШ-нь, Болотниковонь лемсэ олимпийской резервань спортшколань шорт-трекень отделениянь спортсментнэ, истя жо тренировкат ютавтыть «Ромодановосахар» ды «Якташлар» шайба марто хоккеень коряс покштнень командатне, конат примить участия Мордовиянь Чемпионатсонть.

Эень дворецэнь прявтонть Иван Трошкинэнь марто Артём Алексеевич кортась эрьва кодамо уровнянь турниртнэнь ютавтомань коряс арсематнеде. «Пелькстамотнень эряви одкстомтомс, - тешкстызе республикань руководителесь. – Те пек покш стимул эйкакштнень туртов». Республикань Прявтонь тевтнень топавтыцясь истя жо кортась спортонь министранть ды Эень дворецэнь руководителенть марто спортонь сооружениянь куполонть витнемадонзо.

Мордовия Республикань Прявтонть пресс-службась