«Течи минь содазь евтатано, Россиянь Федерациянь Президентэнь кочкамотне ютавтовсть, сынь законнойть, легитимнойть. Улить невтевкст, конатнень коряс мереви кортамс неень шкань Президентэнть кемевикс изнямодонзо», – мерсь Артём Здунов.
Мордовиясо кочкамонь кампаниясь ютась сэтьме лувсо, покш коламот апак редя. Мордовиянь эрицятне невтсть покш эрязачи. Республикась кармась васенцекс Равчирень федеральной округонь регионтнэнь ютксо кочкамонь участкатнес эрицятнень самост коряс – малав 85%. Владимир Путинэнь кисэ вайгелест максызь республикань 89% седе ламо эрицятне.
Кочкамонь участкатнес эрицятнень самост коряс сехте вадрят невтевксэст Отяжбуень, Ромодановань ды Дубенкань енкстнэнь - 96,69 % ды седе ламо. 90 % невтевксэсь печтязь республикань 21 муниципальной районсонть. Неень шкань Президентэнть кисэ сехте ламо вайгельть максозь: Дубенкань енкссо – 96,35 %, Ташто Шайговань – 95,67 %, Теньгушевань – 95,18 %. Владимир Путинэнь кирдизь 90% сехте ламо кочкицят Мордовиянь 21 районсонть. Региононь руководителесь истя жо тешкстызе Рузаевкань енксонь эрицятнень кочкамонь эрязачист.
Сюкпрянь вал марто Артём Здунов пшкадсь весенень, кие сась кочкамонь участкатнес: «Вечкевикс землякт! Сюкпря тенк гражданской ероков ванновтонть кисэ, кемевиксчинть кисэ, масторонь ды республикань вандынь чинтень виде мелень явоманть кисэ».
Кочкамонь читнестэ 6 тежат ероков эрицятне ульнесть кочкамонь комиссиянь членэкс. Тедеде васенцеде УИК-нь члентнэ ульнесть «ИНФОРМ-УИК» проектэнь топавтомасо – ютавтсть толковамонь важодема. Региононь руководителесь истя жо евтась сюкпря весенень, кие ульнесь штабтнень ды инициативной вейсэндявкстнэнь важодемасо, кочкамонь кампаниятнень анокстыцятненень ды участниктненень - наблюдательтненень, добровольцтнэнень, медиктненень, правань ванстомань органтнэнь, экстренной ды коммунальной службатнень представительтненень, республикань оштнесэ ды районтнэсэ властень органтнэнь важодицятненень, СМИ-нь представительтненень – весе тевтнень куроксто ды видестэ невтемаст кисэ.
Тешкстасынек, республикань 739 кочкамонь участкатнесэ важодсть малав 2,5 тежат наблюдательть эрьва кодат партиятнень ды организациятнень пельде, ладязель общественной ванномань лув. Кочкамонь туртов 269 участкатнес путозельть видеонаблюдениянь средстват – тосо вайгелест максызь республикань весе кочкицятнень эйстэ малав 71%. Мордовиясо неть читнестэ важодсть раськеютконь экспертт – сынь тешкстызь кочкамонь невтевкстнэнь видечинть.
«Арсян, Россиянь Федерациянь кочказь Президентэнть виевстэ кирдить ломантне. Минь кадовинек важодеме виев национальной лидерэнть марто, сонзэ селмонзо ало. Минек туртов те эрявикс кочкамо! – мерсь Артём Здунов. – Мордовиянь кочкицятне эште весть невтизь примазь решениясонть видечинть».
Мордовиянь Прявтось тешкстызе, республиканть учи покш важодема проекттнэнь коряс, конатнень кирдинзе масторонь Президентэсь – экономикань башка зонань теемань, социально-экономической виевгавтомань башка программань топавтомань, СВО-нь участниктнень кирдемань ды реабилитациянь коряс.
«Те кочкамонть сехте прявт енксось – стабильностесь, порядокось ды минек седе тов касомась-виензамось. Тынк марто вейсэ ней минь тейтяно Россиянь од история. Те вий, авторитет, истя жо раськеютконь аренасо. Минь марятано кемема вандынь чисэнть!» – тешкстызе Артём Здунов.
Региононь руководителесь истя жо тешкстынзе решениятнень, конатнень Президентэсь яволявтынзе аволь умонь кучомасонть, сынь кандыть лезэ Мордовиянтень. Сынь токшить субъекттнэнь долкост нардамонть, семиятнень ды од ломантнень кирдеманть, демографиянть, важодемань ресурстнэнь.
«Весе неть решениятнень карматано топавтомо республикасонть, васняяк – улеме Президентэнь программатнесэ, явовтомо ярмакт, строямо, – мерсь Артём Здунов. – Минь весе масторлангонтень невтинек: минь вейсэ, мезеяк лангс апак вано. Виевстэ мольтяно икелев!»
Мордовия Республикань Прявтонь пресс-службась