«Рузаевкань енксонь эрицятне невтсть чарькодема ды кирдизь Россиянь меленть прядомс Украинань ды Донбассонь кавксо иень каршо молеманть. Ды течи минек цератне поладыть ванстомо Чачома масторонь рубежтнэнь, честь марто топавтыть воинской долгост», – мерсь райононь руководителесь.
Райононь промышленной предприятиятне вадрясто прядызь ютазь иенть – груздязь товартнэнь, топавтозь тевтнень ды услугатнень покшолманть коряс невтевксэсь топавтозь 134% – те 50,6 млрд целковойть. Райононь историянть перть колмоцеде кшинь кастыцятне печтизь 100 тежат тоннат урожайностень тешксэнть, пурнасть малав 105,5 тежат тоннат сюро. Уш 13 иеть Рузаевкань енксось саи васенце таркат ловсонь производстванть коряс – 52 тежадо ламо тоннат, те 11 проценттэ ламо весереспубликань покшолманть эйстэ. Неть невтевкстнэнь эряви эште кастомс. АПК-со невтевкстнэнь вадрялгавтоманть туртов райононь прявтось Александр Юткин кармавтсь 2023 иестэ нолдамс тевс кадозь модатнень.
Тешкстазель, вадря динамика ванстови инвестициятнень явовтоманть коряс. Иенть перть те енксонть коряс аравтлувось топавтозь 2,5-ксть – прявт капиталс путозь инвестицият 1 млрд ламо целковойть. Те лездась теемс 327 важодемань таркат. Башка путовкс теить «Рузаевка» ТОСЭР-нь предприятиятне-резиденттнэ: весе шканть перть сынь тейсть 1110 важодемань таркат, инвестициятнень покшолмась малав 11 млрд целковойть.
Мелят прядовсь «Рузово» ЗАО-нь ды «Агросоюз-Красное сельцо» ООО-нь инвестпроекттнэнь топавтомань омбоце пельксэсь, тосо поладови 1000 пряс ловсонь комплексэнь строямось. Тедеде арсеви ушодомс од инвестпроекттнэнь топавтоманть, 2 млрд ламо целковойтнень питнесэ: «Талина» ПГ-нь сывелень продукциянь переработкань коряс заводонь ды «Газомоторные комплексы» ООО-нь газомоторной станциятнень строямонть. «Исток» агропредприятиянть арсемасо ракшань кирдемань комплексэнь строямось. Целанек жо 2023 иестэ райононтень инвестициятне кармить 1,8 млрд ламо целковойть.
Районсонть редяви вишка ды средней бизнесэнь субъекттнэнь ламолгадомась – ней эйстэст 1,3 тежадо седе ламо. Сынь максыть важодемань таркат 3,3 тежат ломантненень.
«Зарплатань покшолмась – вадря эрямонь прявт невтевкстнэде вейкесь. Ней райононь покш ды средней предприятиятнень коряс те 48 тежадо ламо целковойть. Текень пингстэ ули кадратнень а сатома, ламот важодить вахтасо. Минь тердтяно инвестрот, панжтано од производстват, тейтяно важодемань таркат, вадрялгавтано-мазылгавтано территориятнень. Эряви велявтомс минек эрицятнень тиринь моданть лангс, семиятнес», – тешкстызе Александр Юткин.
Иень перть районсонть строязь малав 28 тежат кавонзазь метрат эрямонь таркат – аравтлувось топавтозь 153%. Те лездась каладозь кудотнестэ одс ютавтомс 168 ломанть. Тедеде эрямонь условияст вадрялгавтсызь эште 128 ломанть.
«Безопасные и качественные автомобильные дороги» нацпроектэнть, «Содействие» целевой программанть лувсо ды Мордовия Республикань Китнень фондонь ярмактнень вельде 2022 иестэ Рузаевкань енкссо витнезь 14 автомобилень кить – финансированиясь кармась малав 179 млн целковойть. 2023 иестэ прядови Рузаевкань Пелевеенксонь обходонть строямось.
Александр Юткин евтась сюкпря республикань Прявтонтень китнень теемань-одкстомтомань кевкстемасонть лездамонть кисэ: «Меельце иетнестэ Рузаевкав сыть пек покш ярмакт. Эрицятне тешкстыть вадря енов полавтоматнень – те минек прявт тевесь».
«Жилье и городская среда» проектэнть лувсо 2022 иестэ педе-пев витнезь кавто кудотнень перька таркатне, МР-нь Китнень фондонь ярмактнень лангс – эште 8 кудотнень перька таркатне, тов ветиця китнень марто (32 млн целковойть). «Формирование комфортной городской среды» программась лездась мелят вадрялгавтомс эште вейке общественной тарканть – Рузаевкань велодромонть перька, сонензэ максозь, «Старт парк» лемесь. Тедеде те программанть вельде васенцеде витнезь-вадрялгавтозь велень тарка - Красное сельцо поселкасонть Прявт площадесь. Тедеде одкстовтови 1905 иень Революциянь курованть скверэсь, прявт тематикакс кармить лия енов а молиця историянь тевтне. Теде башка, топавтови «Зеленая сцепка» проектэсь – Горшковонь бульваронть витнемс-одкстомтомс 85 млн целковойтнень покшолмасо грантось Рузаевкантень максозь Россиянь вишка оштнень ютксо ошонь вадря средань теемань сехте вадря проекттнэнь весероссиянь пелькстамосо изнямонть кисэ.
«Одкстомтомань туртов весе таркатнень кочкизь сынсь эрицятне», – тешкстызе Рузаевкань енксонь прявтось. Мелят «Комплексное развитие сельских территорий» программась лездась топавтомс Рузаевкань енкссо вадрялгавтомань-мазылгавтомань коряс 5 проектт - Татарская Пишля, Красный Клин, Сузгарье, Мордовская Пишля ды Аргамаково велетнесэ. 2023 иестэ арсеви совавтомс эрямос эште 12 проектт. Сехте ламо ярмакт путовить Красное сельцо поселкантень – тесэ строяви Культурань од кудо, ведень пачтямонь сетть ды витневи эйдень кужось.
Школатнень педе-пев витнемань федеральной программанть коряс важодемат ютавтозь 5№ школасонть. Важодемат уш ветявить 7№ школасонть, Трускляй велень школасонть, истя жо тедеде педе-пев витневи Татарская Пишля велень школась. «Здравоохранение» нацпроектэнть вельде поладови Филатовонь куросонть поликлиникань педе-пев витнемась, тевтне прядовить тедеде. Ушодовсь Эйкакшонь поликлиникань строямось – важодематне прядовить сундерьковонь 1-це чинтень. Тешкстазель, районсонть а сатыть кадрат шумбрачинь ванстомань енкссонть: Рузаевкань ЦРБ-нь эрявить педиатрат, участковой терапевтт, ФАП-нь фельдшерт. Иень перть важодемань таркат максозь 7 специалисттнэнень, конат тонавтнесть целевой направлениятнень коряс. Ней ординатура ютыть эште 7 ломанть. Эряви теемс условият, штобу специалисттнэ кемекставольть районсонть.
Иень перть важодеманть коряс Рузаевкань енксось сайсь васенце тарка регионсонть культурань кастоманть-кепетеманть коряс. Педе-пев витнезь Приреченской клубось, поладови библиотекатнень одкстомтомась, «Местный дом культуры» проектэнть лувсо велень клубтнень материально-технической юронь кемекстамось. Мордовиясо кизэнь прявт тевтнестэ вейкекс кармась «КургонЯ» Раськень культурань регионъютконь фестивалесь. Ней сон совавтозь «Развитие культуры и туризма» МР-нь госпрограммань мероприятиятнень весереспубликань аравтлувонтень – сонзэ арсеви ютавтомс кавто читнень перть, те лезды тердемс седе ламо участникть ды туристт.
«Минь аноктано куш кодат од тердематненень, бажатано лезэвстэ топавтомс весе тевтнень, конатнень путынзе Россиянь Президентэсь ды республикань руководствась!» – прядызе кортамонзо Рузаевкань енксонь прявтось Александр Юткин.
Сессиянть лувсо эсь изнявкстнэде евтнесть прявт промышленной предприятиятнень руководительтне – сынь эрязасто топавтыть инвестпроекттнэнь. «Рузхиммаш» АО-сь икельдинзе прибылень, од продукттнэнь нолдамонь коряс невтевкстнэнь, кепедезь зарплатась. Предприятиясь нолдась 2 тежадо седе ламо вагонт, 40% кассь выручкась. «Конструкционные композиты» ООО-сь топавты зярыя инвестпроектт, истя жо Росатомонть марто вейсэ. «Рузово» предприятиясь иень перть нолдась 360 млн алт: пачтявить масторонь малав весе регионтнэс. Топавтозь 350 млн целковойтнень питнесэ инвестроектэсь. «Экспонента» организациясь арси ютавтомс тедеде республикасонть строямонь химикаттнэнь коряс раськеютконь семинар.
Мордовиянь Прявтось Артём Здунов евтась сюкпря промышленниктненень домка пачтямотнень ды райононь ды республикань виевгавтомантень редявикс путовксонть кисэ. Тень кувалма сон явсь башка мель финанстнэнь енксонтень: «Бути явомс сатышка мель производствань кевкстематненень ды од проекттнэнь кирдемантень, мезенть тынь лезэвстэ топавтадо, те лезды кастомс бюджетэнь доходтнэнь, ды – топавтомс ламот социальной тевтнень».
Тешкстазель, районсонть кассть аволь налогонь доходтнэ, эряви важодемс налогонь базань пачтямотнень коряс - НДФЛ-нь налогообложениянь патентэнь системанть, модань ды велень хозяйствань вейкине налогонть.
Райононть коряс муниципальной финанстнэнь шумбралгавтомань программанть эйстэ лезэвчись кармась 152 млн целковойть. Те вадря невтевксэнть эряви кирдемс. Региононь руководителесь истя жо явсь мель финансонь дисциплинанть лангс, истя жо долктнень реструктуризациянть: ярмактнень лезэвстэ тевс нолдамось ды вадря доходтнэ – изнявкстнэнь юр. Районсонть 40% киртявсть бизнесэнть икеле бюджетэнь долктне, долконь пельксэсь эште ванстови – те 33 млн целковойть. Мордовиянь Прявтось кармавтсь ванстомс саезь лувонть, ды целанек пекстамс кадовозь долктнень.
Райононтень эряви виевгавтомс важодеманть недвижимой ули-паронь инвентаризациянть коряс, конань лангс праватне апак теевте – Рузаевкань енкссо 18 тежадо ламо истят объектт, мелят сынь киртявсть 4,5%. Текень марто, республиканть икеле ашти тев – целанек прядомс те тевенть 2026 иентень.
Маласо 4-5 иетнестэ районсонть строявить 20 ламо объектт, вейсэнь питнесэ 2 млрд аволь седе аламо целковойть. Прявт социальной объекттнэнь тешкстынзе райононь прявтось. Вейкесь юткстост – физкультурань-шумбрачинь витемань комплексэсь – бороцямонь куншкакурось. Рузаевкась – бороцицятнень анокстамонь коряс раськеютконь куншкакуро, истямо куншкакуро тезэнь эряви, секскак сонзэ строямонть арсеви эрязкавтомс.
«Экология» нацпроектэнть коряс Рузаевкасо моли ташто шукшпрянь ванськавтомась. Мордовиясь васенце регионтнэнь ютксо, конат совасть программантень. Тень вельде 2026 иентень малав 7 гектарт модатнмодатнень мереви совавтомс велень хозяйствань тевдеемантень.
Рузаевкасо прядовсь канализациянь коллекторонь строямось, конанть лангс райононтень явозь 200 млн целковойть «Содействие развитию инфраструктуры субъектов РФ» федеральной проектэнть лувсо. Текень марто, апак вите кевкстемась, конась сюлмавозь Рузаевкань «Водоканалонть» марто – ресурсонь пачтиця компаниянь сеттнень башка пелькстнэ таштомсть 70-90%, частной организациянь руководствась а капши ютавтомс те важодеманть. Мордовиянь Прявтось тешкстызе, частной кедьтнес объектэнь максомань кевкстемась ваннови прокуратурасо. «Ютазь шкань те ильведевксэнть миненек сави витемс», – мерсь Артём Здунов.
Мордовиянь Прявтось тешкстызе, райононь 21% МКД-тнень арасть управляющей компанияст: «Ломанентень а ков пшкадемс стакачинть марто. Эряви тень витемс».
Сыця сезонстонть арсевить витнемс китнень 18 объектт. «Рузаевкантень эряви лездамс: бути МР-нь Китнень фондсонть кармить башка доходт, Рузаевкантень сынь явовост васенцекс: тесэ ламо ломанть, тей минь тердтяно инвесторт», – макссь кармавтома региононь руководителесь те кевкстеманть ветиця министерствантень.
Мордовиянь Прявтось тешкстызе, Рузаевкасо васенцетнень ютксо теезь «Движение первых» организациянь ячейкась. Сон максы покш возможностть од ломанень инфраструктурань виевгавтоманть коряс, неть гранттнэнь эряви нолдамс тевс. Тедеде арсеви одкстомтомс «Изумрудный» Мордовиянь сехте умонь лагеренть. Республикась совась варчамонь 16 регионтнэнь юткс – лагересь республикасонть васенцекс прими участия эйкакштнень оймсемань ды шумбрачист витемань куроксто стявтовиця конструкциятнень теемань коряс федеральной программасонть, те лезды строямс неень шкань удомань 2 корпуст ды ламолгавтомс лагерьсэнть таркатнень 350 видьс.
«Районось лиси касомань-кепетемань вадря лувонтень, командась виев, важодеме бажамось ули. Уцяска тенк!» – мерсь Артём Здунов.
Мордовия Республикань Прявтонь пресс-службась