Таштамковонь 15-це чистэ Мордовия Республикань Прявтонь тевтнень топавтыцясь Артём Здунов Рузаевкасо ваннынзе ошонь вадрялгавтомань-одкстомтомань объекттнэнь, истя жо Машиностроительтнень аллеянть.
Культурань ды оймсемань паркось витнезь тедеде вишка оштнесэ ды исторической поселениятнесэ ошонь вадря средань теемань проекттнэнь Весероссиянь пелькстамосонть улемань результаттнэнь коряс.
Тесэ полавтызь ялго якамонь яннэтнень, одкстомтызь совамонь тарканть, путсть нурьсемат, эземнеть, эйкакшонь покш площадка, педе пев витнизь кизэнь сценанть. Истя жо ветязь валдо ды видеонаблюдения. Парконь башка енксось - те чипаень часстнэ, сехте покшт Россиянь келес.
Артём Здунов явсь мель, аттракционтнэ тесэ аволь сехте одт. Райононь прявтось Александр Сайгачев толковизе, администрациясь важоди те кевкстеманть лангсо, ветявить кортамот инвестортнэнь марто.
"Паркось покш, паро. Неяви, строицятне важодсть алкуксокс. Ансяк мон а неян микшнемань вейкеяк объект. Ваннынк те тевенть. Максодо предпринимательтненень важодемс, ломантненень - вадрясто оймсемс. Курок теле, парксонть улезэ пси чай, кофе, паряк, пачалксеть эли эште мезеяк. Ды микшнемс эряви аволь ансяк вейке таркасо. Илядо лепштя налогтнесэ вишка бизнесэнть, максодо тенст кодаткак льготат. Кемеде бизнесментнэнень ды сынь тейсызь парконть седеяк вадрякс", - мерсь Мордовиянь Прявтонь тевтнень топавтыцясь.
Машиностроительтнень аллеясь теезь Рузаевкасо «Формирование комфортной городской среды» проектэнть вельде. Федеральной бюджетэсь строямонь тевтнес явсь малав 35 млн целковойть. Тесэ тейсть тротуарт, эйкакшонь ды спортонь площадкат, эземнеть, арт-объектт. Ули алкуксонь сцена. Видезь газон, озавтозь цецят ды куракшт. Аллеянть теемасо лездась «Рузхиммаш» АО-сь.
Региононь руководителесь кевкстнинзе ошонь эрицятнень, мельс тусть эли эзть топавтозь тевтне. Эрицятне евтасть сюкпря те казненть кисэ, конань ней ловить микрорайононть алкуксонь каштанчикс.
Мордовия Республикань Прявтонь пресс-службась