Артём Здунов – сахоронь производительтненень лезкстэнть: «Те Правительстванть шкастонзо кемекстазь решениясь»

Артём Здунов – сахоронь производительтненень лезкстэнть: «Те Правительстванть шкастонзо кемекстазь решениясь»

Чадыковонь 7-це чистэ Россиянь премьер-министрась Михаил Мишустин тешкстась распоряжения, конань коряс явсь 9 млрд целковойть сахоронь ды постной оень нолдыцятненень ютавкстнэнь компенсациянть туртов. Субсидиятнень вельде сахоронь 1 килонть питнезэ карми 36 целковойде аволь седе ламо оптовиктнень туртов ды 46 целковойде аволь седе ламо – башка-башка рамсицятнень туртов, оень 1 литрась – 95 ды 110 целковойть. Трансфертнэ явовить регионтнэнь пельде кучозь яволявтоматнень коряс.

Распоряжениясь, конань тешкстызе масторонь премьер-министрась, целанек токши Мордовиянть. Ромодановань сахоронь заводось сови Россиянь кемень покш предприятиятнень юткс. Сахоронть тесэ микшнить истя жо региононть томбале, ды аволь ансяк внутренней рынкасонть.

Мордовиянь Прявтонь тевтнень топавтыцясь тешкстызе те документэнь эрявиксчинть. «Минек туртов те пек эрявикс, государствась лезды сахоронь производительтненень – те пек шкастонзо, - тешкстызе Артём Здунов. – Те лезкс сыця производственной шкантень – ламбамо якстерькаень видемань паксятнень, производствань вийтнень покшолгавтомга, важодемань од таркатнень теемга. Арсян, неть условиятнесэ те иень урожаесь топавтсы пищевой промышленностенть ды эрицятнень сахорсо вешеманть, кирдьсы питненть те продуктанть лангс».

«Минь кирдтянок Россиянь Правительстванть, секскак тешкстынек вейсладямо микшнемань сеттнень марто кемекстазь питненть коряс сахоронть микшнемадо – 36 целковойть килонть кисэ. Республикасонть сахоронь таштавкстнэ – 48 тёжат тоннат. Тедеде ламбамо якстерькаень видемань паксятне покшолгавтовить 17%. Минь нолдатанок экстра-классонь сахор, конась лади технологиянь куш-кодамо процессэнтень», - тешкстызе «Ромодановосахаронь» прявтось Александр Атласов.

Ледстясынек, сахоронь ды оень производительтнень субсидированиядо решениясь сови ярсамопельтнень лангс питнетнень валгстомань коряс тевтнень юткс, конатнень анокстынзе Правительствась масторонь Президентэнть Владимир Путинэнь кармавтоманзо коряс. Тевтнень куроксто витеманть туртов пурназь важодемань межведомственной группа, конань прявтсо васенце вице-премьерэсь Андрей Белоусов.

Мордовия Республикань Прявтонть пресс-службась