Кортамось мольсь интеллектуальной ули-паронь кевкстематнеде, интеллектуальной правань рынканть виевгавтомасо Россиянь регионтнэнь таликадост.
Видеосвязенть вельде промксонть панжизе Федерациянь Советэнь Председателесь Валентина Матвиенко. Сон евтась сюкпря Мордовиянь Прявтонтень регионсонть промксонь ютавтоманть ды интеллектуальной ули-паронь институтонтень лездамонь коряс важодеманть кисэ. Тедеде Мордовиянтень максозь «Столица изобретательства России» аволь официальной статусось.
«Течи Советэсь – интеллектуальной ули-паронь енкссонть государственной политикань кортамонть туртов масторонь прявт площадка. Федеральной уровнясонть теезь эрявикс законодательной юр. Регионтнэнь тевест – вейсэндявомс важодемантень, совавтомс бизнесэнть, теемс региононь экономикань касомань таркат. Кеман, РФ-нь сеть субъекттнэ, конат течи важодить интеллектуальной правань рынкань виевгавтоманть коряс, теить вадря эрямонь лув кементь иетнес», – тешкстызе Валентина Матвиенко.
Сон мерсь, Россиянь Минэкономразвитиясь нолдась платформа, конасонть пурнавить РФ-нь субъекттнэнь интеллектуальной ули-паронь системань виевгавтомань невтевкстнэ, теезь
регионтнэнь патентэнь ерокчинь индексэнь тешкстамонь методикась.
«Неень шкась лиятнень енов а молиця. Сон панжи минек икеле возможностень вальма. Минек тевенек – лездамс а пелиця, ероков ды мелень явиця ломантненень получамс олячинть: лезэв мельтне-арсематне седе куроксто совавтовольть эрямос», – мерсь Валентина Матвиенко, тешкстызе, чадыковсто масторонь регионтнэсэ панжовить Интеллектуальной ули-паронь читне.
Артём Здунов евтась сюкпря Советэнь выездной промксонть ютавтомань таркакс Мордовиянь кочкамонть кисэ. Сон евтнесь, мелят регионсонть колмоце пельксэс ламолгадсть од муевкстнэнь ды лезэв модельтнень лангс яволявтоматне, истя жо од муевкстнэнь ерокчинь коэффициентэсь, нилеце пельксэс – максозь патенттнэ. Республикань руководителесь яволявтсь зярыя од ушодкстнэде.
«Нама, импортонь полавтоманть виевгавтомась лезды теемс седе ероковокс од муевкстнэнь коряс тевдееманть ды интеллектуальной ули-паронь управлениянть. Ансяк те вети пелькстамотнень ламолгадомантень. Эряви теемс масторонь субъекттнэнь арбитражной судтнэнь пингстэ интеллектуальной ули-паронь праватнень коряс специализированной куншкакурот, варчамонь проектэнть туртов – теемс истямо куншкакуро Мордовиянь Арбитражной судонть пингстэ, ПФО-со судонь пелькстамотнень ванномаст туртов», – евтынзе арсеманзо Артём Здунов, тешкстызе, Мордовиясь анок путомс тесэ Равчирень ды Уралонь регионтнэнь туртов интеллектуальной праватнень коряс Судонь улемань точканть.
Валентина Матвиенко кирдинзе неть ушодкстнэнь, тешкстызе, истят регионтнэнь лангс, кода Мордовиясь, эряви нежедемс. Эрьва региононть ули потенциалозо, ансяк ламось ашти руководителенть ды те енксонь виевгавтомань эрявиксчинь чарькодеманть эйстэ.
Советэнь тевдеемань цетавкстнэде промкстнэнь ютксо эсь пачтямосонзо евтнесь Федерациянь Советэнь Наукань, тонавтомань ды культурань коряс комитетэнь председателесь Лилия Гумерова. Сон тешкстызе, одкстомтозь нормативно-правовой юрось – совавтозь полавтомат патенттнэде законтнэс, гражданской кодексэнтень.
«Мордовиясь – сеть регионтнэстэ вейкесь, косо руководствась чарькодьсы ды кирди те енксонть. Республикась – минек советэнь теевемань чистэнть саезь васенце совицятнестэ вейкесь. Течи Технопарксонть минь неинек зярыя мельстуиця, инновациянь производстват, ды чарькодьтяно, сыненст пек эряви: продукциясь седе курок совавтоволь эрямос, саевлинзе промышленной покшолматнень. Минек советэнь решениятне лездыть тенень», – мерсь Лилия Гумерова.
РФ-нь Экономической виевгавтомань Министрань полавтыцясь Владислав Федулов кортась интеллектуальной ули-паронь праватнень топавтомань, технической од решениятнень ды технологиятнень ванстомань кевкстематнеде. «Те лезды регионтнэсэ компаниятненень саемс аволь ансяк Россиянь рынкань пельксэнть, истя жо ушодомс продукциянь экспортонть, кемемс праватнень вадрясто ванстоманть лангс». Министрань полавтыцясь истя жо кортась внутренней туризмань виевгавтомань кевкстематнеде, те лезды кастомс региононь ды местной продукциянь миемань покшолматнень.
Россиясо интеллектуальной праватнень рынкань седе тов кастоманть, интеллектуальной ули-паронь институтонь виевгавтоманть коряс мелест-арсемаст евтызь Мордовиянь покш бизнесэнь представительтне: «РМ Рейл» компаниянь технической виевгавтоманть коряс прявтось Сергей Дробжев ды "Промомед" компаниятнень группань прявттнэнь советэнь председателесь Пётр Белый.
Отраслянь виевгавтомань ды потребительтнень праваст ванстомань енксонть одкстомтомадо кортась "Сколково" Фондонь правлениянь председателесь Игорь Дроздов. Регионтнэсэ интеллектуальной ули-паронть коряс эсест ванновтост евтызь бизнесэнь финансонь виевгавтомань институтонь прявтось Ильдар Шайхутдинов ды Россиянь научно-технической енкссонть экономикань, политикань ды правань научно-исследовательской институтонь прявтось Ирина Ильина.
Патентэнь политикадонть ды интеллектуальной ули-паронь коряс стакачитнеде кортасть Роспатентэнь руководителесь Юрий Зубов ды Евразиянь патентэнь ведомствань президентэсь Григорий Ивлиев.
Промксонть прядовомга Саранскоень 43№ Лицеень тонавтницянтень Артём Суриннэнь максозь Евразиянь патентэнь ведомствань медалесь, сон изнясь «Школьный патент – шаг в будущее» пелькстамосонть.
Промксонть прядовомга анокстави решения, ков совавтовить РФ-нь Правительствас, федеральной министерстватнес ды ведомстватнес, РФ-нь субъекттнэнь властень органтнэс рекомендациятне, сынь токшить кепедезь кевкстематнень лезэвстэ витеманть.
Итогтнень евтамсто, Федерациянь Советэнь Председателень васенце полавтыцясь Андрей Яцкин тешкстызе: «Мордовиясь содавикс од теевкстнэнь ерокчисэнть ды инновациятнесэ. Течи региононь деловой кругонь представительтне евтасть анокчи вейсэндявомс Советэнь важодемантень. Кеман, Мордовиясо ули од муевкстнэнь коммерциализациянть ды наукоемкой технологиятнень трансферэнь виевгавтоманть туртов технологиянь эрявикс потенциал».
Мордовия Республикань Прявтонь пресс-службась