Чадыковонь 9-це чистэ Саранскойсэ Мордовия Республикань Торгово-промышленной палатанть юрсо панжовсь Казахстан Республикань Почётной консулонь офис. Те эскельксэсь кармась меельце иетнестэ Мордовиянть ды Казахстанонть ютксо сюлмавоматнень касомань-кепетемань цётамокс.
Кода тешкстызе РФ-со Казахстан Республикань Чрезвычайной ды Полномочной Посолось Даурен Абаев, офисэнь панжомась корты седе: Казахстанось ды Мордовиясь анокт седеяк эрязасто важодемс ды пештямс вейсэнь важодеманть од смустьсэ. «Ёвтатано сюкпря Мордовиянь руководствантень те ушодксонть кирдеманзо кисэ, вейсэнь важодемантень панжадочинть ды Казахстанонтень лембе мелень явоманть кисэ, конась пек маряви тынк республикасо. Казахстанонть туртов Россиясь ульнесь ды кадови прявт стратегической партнёрокс ды кеме союзникекс. Кеман, панжовиця офисэнь тевдеемась лезды келейгавтомс деловой ды гуманитарной сюлмотнень, истя жо лездамс практической кевкстематнень витемасо. Минек ютксо ули историянь домкачияк - Казахстансо эрзянь ды мокшонь этнокультурной вейсэндявкссонть лововить малав 8 тёжат ломанть. Те раськетнень ютксо ояксчинь, вейке-вейкень чарькодемань ды мелень явомань эрикс сэдь. Кеман, офисэсь карми лезэв площадкакс од ды лезэв ушодкстнэнь туртов», – мерсь сон.
Неть читнестэ Мордовиясо ютыть Казахстанонь культурань чить, ков совить «Современный Казахстан» фотовыставкась ды Казахстанонь кинонь невтемась. Неть мероприятиятне лездыть виевгавтомс таркатнень вейкест-вейкест коряс мелень явоманть.
«Саранскойсэ Казахстан Республикань Почетной консулонь офисэнь панжомась - те, васняяк, важодемань инструмент, сон лезды минек бизнесэнтень, - тешкстызе Мордовиянь Прявтось. - Минек уш ладявсть кавто ёндонь виев сюлмот. Меельце иетнестэ товарооборотонок кассь кавксть. Казахстанось саи васенце тарка минек экспортсонть. Ней минь анокстатано Казахстанов Мордовия Республикань бизнес-миссиянть, кеместэ важодтяно предприятиятнень ды министерстватнень руководстванть марто. Эряви ютавтомс бизнес-миссиянть лезэвстэ».
Саранск ошсо Казахстан Республикань почётной консулось Андрей Рогачев мерсь: «Анокан эряза, лезэв ды инициативной важодемантень, конась аравтозь вейсэнь вадря цетавксонть лангс».
Мордовия Республикань Прявтонь Пресс-службась