Чадыковонь 6-це чистэ Мордовиянь Прявтонь тевтнень топавтыцясь Артём Здунов якась Саранскойсэ Россиянь Армиянь проспектсэнть 3№ поликлиникантень.
Республикань руководителесь ваннынзе медучреждениянь возможностнень, тей кандовить малав 20 тёжат эрицятне. Тесэ тевс нолдави «ванстыця поликлиникань» лувось. Поликлиникань каштанчись - КТ- ды МРТ-диагностикань кабинеттнэнь оборудованиясь. Пандемиянть шкасто тесэ теезь обследования 17 тёжадо ламо пациенттнэнень. Од поликлиникась, конасонть путозь неень шкань оборудования, те стака шкастонть шождалгавтызе стационаронь учреждениятнень тевдеемаст, тень вельде лездась региононь здравоохранениянтень печтямс стакачитнень.
Онкологиянь амбулаторной лезксэнь куншкакурось – од поликлиникань эштё вейке башка ёнксось. Тесэ ютавтовить весе манипуляциятне ды процедуратне, конат лездыть редямс онкологиянь орманть ушодовомстонзо. Истя жо ули психологиянь лездамонь нупаль сеттнень туртов, кие вастовсь те стака орманть марто.
Артём Здунов ваннызе телемедицинань важодеманть. Поликлиникань кардиологось ютавтсь консультация Лямбирень ёнкссо поселкань ФАП-нь коллеганть туртов. Телекардиографонть вельде сон ваннынзе пациентэнть данноензэ ды макссь превспутомат седе тов лецямонть коряс.
Региононь руководителесь истя жо кортась медицинань профилактикань кабинетэнь сотрудниктнень ды пациенттнэнь марто – тесэ путовить ливкст коронавирусонь инфекциянть каршо. Весемесь топавтови стандарттнэнь коряс, микрорайононь эрицятне эрязасто сермадстыть пряст ливксэнь путомо. Ледстясынек, неть читнестэ республикав пачтязь вакцинань 33700 комплектт, весемезэ – малав 100 тёжат. Эрьва чистэ ливкст путовить малав 2 тежат эрицятненень, весемезэ вакцинась путозь Мордовиянь 62 тёжадо ламо эрицятненень.
МР-нь здравоохранениянь министрань тевтнень топавтыцясь Олег Маркин пачтясь Артём Здуновнень тедеде ушодовозь здравоохранениянь первичной звенань одкстомтомань вете иень программанть Мордовиясо топавтомадонзо. Ледстясынек, весе масторонь келес «первичканть» одкстомтомань коряс важодемась ушодозь Россиянь Президентэнть Владимир Путинэнь ушодксонзо коряс.
Министрась ёвтнесь региононь прявтонтень республикасонть весе первичной звенань инвентаризациядонть, истя жо велень районтнэсэ. Ванноматне невтизь – поликлиникань отделениятнень весе инфраструктуранть эйстэ 60% эряви витнемс, тов апак совавто ФАП-не ды врачонь амбулаториятне. 100 ламо зданиятнень витнемс эрявить 10,7 млрд ламо целковойть. «Модернизация первичного звена здравоохранения» программань топавтоманть лувсо республикантень федеральной центрасто уш явозь 2,8 млрд целковойть. Васенцесь, ков явовить неть ярмактне – Рузаевкасо эйкакшонь поликлиникань од зданиянть строямс, уш анок ПСД-сь, явозь мода.
Теде башка, чадыковонь 5-це чистэ ушодозь Саранскойсэ эйкакшонь 2№ поликлиникасонть строямонь-монтажонь тевтне, проектированиянь лувсо – первичной эштё 5 подразделениятнень витнемась, сынст ютксо - Краснослободскоень, Рузаевкань ды Комсомольскоень районной больницятнесэ поликлиникатне. Кода толковизе министрась, одкстомтомань весе бюджетэнть лувсо ярмактнень 70% явозь витнемантень ды строямонтень, 28% - оборудованиянь ды транспортонь рамамс, штобу пациенттнэ, седе сеедьстэ велетнестэ, куроксто пачкодест стационартнэс ды профосмотратнес. Те иентень арсематнесэ – медицинань оборудованиянь 238 единицатнень ды 58 легковой машинатнень рамамось. Весемезэ 2021 иестэнть Мордовиянь шумбрачинь ванстомань первичной звенанть неень шкань вешематненень ладямонтень явовить 525 миллиондо ламо целковойть.
Артём Здунов тешкстызе: «Весе ярмактне, конат пачтявить республикав шумбрачинь ванстомань первичной звенанть одкстомтоманть туртов, лезэвстэ нолдавост тевс Мордовиянь эрицятнень мелест ванозь. Секскак региононь минздравонть ды финансонь контролень службанть прявт тевест – ванномс, вейкеяк целковоесь илязо туе лия тевс! Те Президентэнть кармавтомазо, вете иетнень перть эряви теемс истя, те сферась ладязо весе стандарттнэнень».
Мордовия Республикань Прявтонть пресс-службась