Аштемковонь 9-це чистэ Мордовиянь Прявтонь тевтнень топавтыцясь ды стратегической инициативань федеральной Агентствань генеральной директоронь полавтыцясь Дмитрий Глушко ваннызь школань кизэнь лагеренть, кона важоди Саранскоень 24№ школасо. Республикань прявтось кортнесь тонавтыцятнень ды эйкакштнень марто, ванызе, кода сынь тонавтнить ды оймсить.
Неень шкане республикасо панжозь школань кизэнь 299 лагерть, сынст ютксо Саранскойсэ – 55. Весе сынь кармить важодеме аштемковонь 3-це чистэ саезь 28-це чис. Эрьва лагерьсэ арсезь тематической программа, ютавтовить мастер-класст, интерактивной урокт, экскурсият, вастовомат ды тонавтомань лия ёнкст. Теезь весемесь, штобу кизэнь каникулатнестэ эйкакштне аволь ансяк оймсевельть, пурнавольть содамочитькак, тонавтневельть мезескак одс ды, паряк, ёвтасызь мелест, кодамо ки кочкамс седе тов.
24№ школань прявтось Сергей Сурайкин ёвтнесь республикань прявтонтень, сынст тонавтомань учреждениясь тевс нолды колмо ёнкст: келень, спортонь ды экологиянь. Эрьванть ули тонавтомань эсензэ лувозо: робототехникань занятият, шахматт, экоквест, викторинат ды, нама, спортонь мероприятият – налксемат ды пелькстамот, сынь эрявить школань кизэнь лагерьсэ.
Мордовиянь Прявтонь тевтнень топавтыцясь ваныннзе лагерень тонавтомань весе таркатнень, кортнесь эйкакштнень ды тонавтыцятнень марто. «Белая ладья» шахматонь клубонь занятиятнесэ республикань прявтонтень евтнесть эйкакштнень изнявкстнэде – 24№ школась шахматонь коряс ловови Мордовиясо лидерэкс. Артем Алексеевич кортнесь Мордовиянь чемпиононть Егор Гавричев марто, сон тонавтни котоце классо. Кадык сон зярс вишка, ули шахматонь коряс покшонь омбоце разрядозо. А кадовить тейтернетнеяк. Школась ашти каштанчисэ шахматисткатнень сазоркатнень София ды Кира Марычеватнень кисэ.
Истя жо Мордовиянь Прявтонь тевтнень топавтыцясь варштынзе робототехникань, космосонь ваномань, пертьпельксэнь коряс занятиятнень. Эрьва косо редявсь, кодамо покш мельсэ эйкакштне бажить содамочинь пурнамо. Келень занятиятнесэ Артём Алексеевич мельспаросо кортнесь эйкакштнень марто англань кельсэ – региононь прявтось сонзэ содасы парсте. Эйкакштне васняяк талакадсть, истямо эзть учне, мейле сеске ушодсть прявтонть кевкстеманзо лангс макснеме каршо валт.
Школань кизэнь лагерьсэ неявикс таркасо спортось – Артём Здунов вастовсь од самбисттнэнь марто, варштась, кода ютыть занятияст, кортнесь Мордовия Республикань самбонь Федерациянь президентэнть Владимир Трушкин марто, ваннызе школань стадиононть. Теде башка, Мордовиянь Прявтонь тевтнень топавтыцясь совсесь столовоев – школань кизэнь лагерьсэ андыть чизэнзэ колмоксть.
Школань прявтось Сергей Сурайкин ды Мордовиянь Прявтонь тевтнень топавтыцясь кортызь школасо зыянонь а нолдамонь кевкстематнень.
Мордовия Республикань Прявтонь Пресс-службась