1959 иестэ «Спартак» Саранскоень стадионсонть региононь историясонть васенцеде ютавтовсть эй лангсо мотогонкат. 1991 иестэ Саранскойсэ васенцеде ютавтовсть масторлангонь личной чемпионатонь четвертьфиналонь гонкат. Республикасо кассть спидвеень масторлангонь зярыя тештть. «Светотехника» стадиононть яжамодонзо мейле – регионсонть мотогонкатнень ютавтомань прявт тарканть, Мордовиясо мотоциклетной спортонь виевгавтомась редявикстэ киртявсь, куш зярыя иетнень перть Мордовиянь спортсментнэ эште якасть весероссиянь пелькстамотнес. Спидвеентень од виевгавтома максозь Мордовиянь Прявтонть Артём Здуновонь кармавтомадонзо мейле сонзэ вельмевтемань эрявиксчинть коряс.
2021 ды 2022 иетнестэ Саранскойсэ ютавтовсть эень спидвеень коряс невтемань выступлениятне, Рузаевкасо – телень мотокросс, конась алтазель Отечествань ванстыцянь чинтень.
Ды вана 2023 иестэ весероссиянь умок учовиця пелькстамотне ушодовсть «Старт» стадионсонть. Якшамковонь 28-це чистэ Саранскоесь кармась Россиянь чемпионатонь высшей лигань васенце пельксэнь прявтошокс. Якшамковонь 29-це чистэ редявить Россиянь Кубоконь высшей лигань васенце пельксэнь изницятне.
«Уш ней апак кавтолдо мереви евтамс, спидвеесь велявтсь Мордовияв, кемекставсь ды зярдояк ковгак а туи. Кирдтядо мельсэнк, кавто иеде икеле минь ютавтынек любительской ардомат, конат виев якшамотнестэ пурнасть 10 тежат ваныцят. Те ламодо корты! Течи ютавтано профессиональной пелькстамот – покш сюкпря Мотоциклетной спортонь Федерациянтень. Шаштано икелев, арсетяно уцяска спортсментнэнень, ваныцятненень – мелень витема спортонь те вадря видэнть эйстэ!» – мерсь Мордовиянь Прявтось Артём Здунов пелькстамотнень панжомсто.
Спортонь кенярксчисэнть ульнесть масторлангонь командань Чемпионатонь чемпионось ды сиянь призерось, Европань кавксть чемпионось Максим Захаров ды масторлангонь личной Чемпионатонь сиянь призерось, командань зачетсонть масторлангонь кавксть Чемпионось, Европань чемпионатонь изницясь ды призерось Юнир Базеев. Саранскоень стадиононь трибунатне пешксельть – ломантне кеняркс ды талнома марто вансть эй лангсо мотогонкатнень мельга.
Саранскоев састь командат Башкортостан Республикасто, Свердловской областень Каменск–Уральский ошстонть, Удмуртиянь Глазов ошстонть, Московонь областень Луховицы ошстонть. Мордовиянть пелькстамотнесэ невтизь спортсментнэ сестэ кавто мотоклубтнестэ: Анатолий Миндровонь лемсэ спортонь технической видтнэнь куншкакуронть ды «Мордовия» клубонть – ДОСААФ. Ней республикасонть мотоциклетной спортонь занятиятнес одс саевить эйкакшт ды од ломанть.
Тешкстасынек, мотогонкатнень коряс те аволь меельце пелькстамо тедеде. Даволковонь 18-це ды 19-це читнестэ Саранскойсэ ютавтовить Россиянь Чемпионатонь высшей лигань омбоце пельксэсь ды Россиянь Кубоконь высшей лигань омбоце пельксэнь командань пелькстамотне.
Мордовия Республикань Прявтонь пресс-службась