Ожоковонь 21-це чистэ Мордовиянь Прявтось Артём Здунов якась Саранскоень «AB InBev Efes» пивань пидемань заводонтень. Региононь руководителесь теевсь содавиксэкс предприятиянь производствань вийтнень марто ды ютась маршрутонть кувалма, конась анокстазь «Промышленный туризм» енксонть лувсо. Экскурсиясонть истя жо ульнесть МР-нь Правительствань Председателень Васенце полавтыцясь Игорь Фрейдин ды Мордовиянь Финансонь министрань тевтнень топавтыцясь Сергей Тюркин.
Артём Здуновнень невтизь Саранскоень пивань пидемань ды солодонь заводтнэнь важодемань цетавксост. Вейсэнь тевдееманть вельде регионсонть теезь производствань кластер, конась вейсэнди масторлангонь сехте вадря технологиятнень лувсо пек вадря пинемень кастоманть, солодонь нолдамонть, истя жо пивань пидемстэ седе тов сонзэ тевс нолдамонть. Тень вельде региононь бюджетс свалшкане пандовить налогт. Саранскойсэ заводсонть важодемань вейке таркась теи малав 10-12 важодемань таркат лия индустриятнесэ.
Меельце иетнестэ моли нолдавиця продукциянь покшолматнень киртямось. Те кевкстемась кортавсть медьковсто Петербургонь экономикань раськеютконь форумсонть Мордовиянь Прявтонть ды холдингень руководстванть важодемань вастовоманть лувсо. Кортасть вейсэнь тевдеемань покшолматнень ванстомадо, истя жо кемекстазь: эряви арсемс производствань кастомань программа.
Артём Здунов тешкстызе, республиканть туртов пек эряви неть тевтнень витемась. "Саранскоень пивань пидемань заводось - региононь покш налогонь пандыцятнестэ вейкесь. Отраслясонть важодить сядот ломанть, а мереви сынст кадомс тевтеме", - тешкстызе Мордовиянь Прявтось.
Саранскойсэ «AB InBev Efes» филиалонь исполнительной прявтось Евгений Унгер пачтясь, зярыя иетнеде икеле предприятиясь рамсесь суликат Рузаевкань суликань заводстонть. Ансяк меельце шкастонть вейсэнь тевдеемась лоткавтозь. Ней ветявить кортамот сонзэ одкстомтомадонзо.
Пивант пидемань предприятиясь истя жо арси нолдамс алюминиень банкатнес симпмапелень пештемань линия. Тень вельде удалы зярыяксть кастомс продукциянь покшолматнень. Мордовиянь Прявтось кармавтсь МР-нь Васенце вице-премьерэнтень Игорь Фрейдиннэнь ладямс компаниянть марто вейсэнь важодемань сюлмот те кевкстеманть витеманзо коряс.
Мордовия Республикань Прявтонь пресс-службась