Таштамковонь 16-це чистэ Саранскойсэ тешкстазь Технопарконть ды «Рутек» АО-ть ютксо вейсэнь важодемадо меморандум.
Мероприятиясонть ульнесть Мордовиянь Прявтонь тевтнень топавтыцясь Артём Здунов ды «Рутек» АО-нь теицясь Леонид Рейман.
«Рутек» АО-нь теицясь толковизе, компаниясь нолды оборудования эрицятнень туртов, телефононь станцият, видеокамерат ды ламо мезе лия, сынст теить-арсить Россиянь специалисттнэ Московонь областьсэ ды Московсо.
"Течинь чис оборудованиянь покш пельксэнть минь нолдынек Московонь областьсэ, ней ваннынек Саранскоев те производствань пельксэнть кандомадонзо, - мерсь Леонид Рейман. - Мордовиясь экономикань ды кадратнень коряс - мельстуиця ды перспективной регион. Минь арсетяно маласо шкастонть теемс тесэ сядо важодемань таркат. Ды те ансяк ушодкс".
"Технопарконть ды «Рутек» компаниянть ютксо вейсэнь важодемадо вейсладямонть тешкстамось - виев эскелькс республикань инновациянь инфраструктуранть виевгавтоманзо туртов, - тешкстызе Артём Здунов. - Минь карматано важодеме компаниянть марто, конась бажи ливтемс Россиянь Федерациянть технологической олячинтень, важоди Россиянь производствань компонентэнь юронть марто, ашти кемевикс партнерокс. Сюкпря минек марто важодеманть кисэ, минь аноктано явомс эрявикс весе лезксэнть".
Мордовия Республикань Прявтонь пресс-службась