Якшамковонь 16-це чистэ республикань сехте сыре ошсонть улемстэ Мордовиянь Прявтонь тевтнень топавтыцясь якась Темниковань историянь-краеведениянь музейс. Течинь чинтень тесэ панжозь 8 залт (сынст ютксо Ф.Ф.Ушаковонь, этнографиянь, боевой ды трудонь славань, неень шкань историянь залтнэ, пертьпельксэнь отделэсь), музеень фондтнэсэ ванстовить 6 тёжадо ламо единицат.
Историянь залсонть, кода ёвтнесь республикань руководителентень музеень прявтось Галина Позднякова, невтезь ошонть теевемань пелькстнэ, экспозициятнесэ – археологиянь невтвекстнэ сень коряс, што те ёнксось уш ульнесь неолитэнь шкатсонть. Краеведениянь музеень каштанчикс ашти Х-ХI пингетнень мечесь.
Эрьва ие музеентень сакшныть малав 7 тёжат ломанть. Сынь теевить содавиксэкс Алёна Арзамасскаянь, Веденяпинт лелят-ялакстнэнь, Императоронь покш театрань солистэнть И.И. Лавровонь ды лиятнень эрямост марто. Музеень важодицятнень бажамост вельде муезь ине флотоводецэнть малавиксэнзэ ды пурназь экспонатонь покш коллекция – тёжадо ламо предметт.
Экскурсиянть прядовомга республикань Прявтонь тевтнень топавтыцясь макссь покш питне музеень экспонаттнэнень. «Тесэ весемесь мельстуиця, неяви профессоналтнэнь важодемаст. Сюкпря!» - мерсь Артём Алексеевич музеень важодицятненень.
Мордовия Республикань Прявтонть пресс-службась