Артём Здунов: «Тынь монень невтинк, тесэ мереви виевгавтомс туризманть!»

Артём Здунов: «Тынь монень невтинк, тесэ мереви виевгавтомс туризманть!»

Мордовиянь Прявтонь тевтнень топавтыцясь Артём Здунов якшамковонь 16-це чистэ важодемань коряс Темниковань ёнкссо улемстэ ютавтсь вастовома бизнесэнть марто те ёнкссонть внутренней туризманть виевгавтомань кевкстематнень коряс. Темниковань ды маласо районтнэнь предпринимательтнеде башка, тесэ ульнесть республикань Экономикань, Велень хозяйствань, Спортонь министерстватнень прявттнэ.

Промксонть панжомсто Мордовиянь руководителесь тешкстызе, те тарканть туристической покш потенциалозо, ансяк министерстватнень ютксо апак ладя вейсэнь важодема, мезесь а нолды те ёнксонь виевгавтоманть. Ней, башка тешкстызе Артём Здунов, эряви пштистэ важодемс тень коряс.

Мордовиянь Прявтонь тевтнень топавтыцясь пшкадсь бизнесэнь представительтненень кевкстема марто: кодат стакачить сынь кирдить ды кодамо лезкс тенст эряви. Кортамось лиссь мельстуицякс, Артём Алексеевич кармавтсь, окойники, ютамс валсто тевс Темниковасо туристической ёнксонть виевгавтомга. Предпринимательтне истя жо кортасть зярыя кевкстематнень коряс: кедьчелькев ломантнень раськень-художественной промыслань продукцияст миемань каналтнэнь келейгавтомадо, Темниковань ёнкссо культурань-оймсемань мероприятиятнень ютавтомадо, республикань районтнэсэ налогонь ставканть валгстомадо.

Седе домкасто те ёнксонть коряс важодезэ муниципалитетэськак, нолдазо тевс гранттнэнь ды федеральной программатнень, истя жо нацпроекттнэнь коряс. Улить стакачитькак, сынст ютксо прявтось – аволь виев инфраструктурась, васняяк – китне. Кортамось моли кинь 14 вайгельбень пельксстэнть, конась вейсэндясы Темникованть Нижегородской областень Дивеева веленть марто, те лезды пачтямс районов ламо туристт.

«Течи теевинь содавиксэкс райононть марто, ды тынь монень невтинк, тесэ мереви виевгавтомс туризманть, - мерсь Артём Здунов. – Секскак течинь тевтнень эряви тешкстамс яволявтомас, проектс, конань лангс мереви получамс финансирования. Тень эряви теемс пек куроксто. Варчатано теемс тесэ  «Саранск - Темников - Санаксарь» эсенек региононь кластер.

Мордовия Республикань Прявтонть пресс-службась