Ожоковонь 25-це чистэ Мордовия Республикань Прявтось Артём Здунов Московсо Россиянь Правительствань Координационной куншкакуросонть ульнесь масторлангонь рынкатнесэ питнетнень коряс ды эсенек масторсо питнетнень лангс сонзэ тешксэнь а путомань коряс тевтнень ванномадо промкссонть. Кортамось истя жо мольсь азотонь удобрениятнень лангс питнетнеде.
Россиянь Правительствань Председателесь Михаил Мишустин ледстизе, сы иень велень хозяйствань цетавкстнэ ушодовить путомо уш те сексестэнть. "Президентэсь кармавтсь покш мель марто ванномс молиця тевтнень ды сундерьковонь 1-це чинтень анокстамс тевть Европань мастортнэсэ энергиянь а сатомань аволь вадря последствиятнень Россиясо тандавкстнэнь а нолдамонть коряс. Сынст ютксо - азотонь удобрениятнень, металлургической продукциянь ды ярсамопелень рынкатнесэ, - мерсь премьер-министрась. - Течи эряви кортамс важодемань эскелькстнэнь, штобу, вейке ендо, внутренней рынкасонть улест рамавиця удобреният, лия ендо - ванстомс Россиясо истят товаронь нолдыцятнень конкуренциянь кирдемань маштомачист ды экспортонь виест. Тень эйстэ ашти ярсамопельтнень лангс питнесь".
Мордовиянть туртов удобрениятнень коряс кевкстематне пек эрявикст - республикась саи васенце таркат Равчирень федеральной округонь ды Россиянь Федерациянь регионтнэнь ютксо вейке ломаненть лангс велень хозяйствань продукциянь тееманть коряс. Те иень 9 ковтнень невтевкстнэ тень кемекстыть - Мордовиясь саи 1 тарка Россиясо ды 1-це тарка ПФО-со алонь ды ловсонь производстванть коряс, 6-це тарка Россиясо ды 2-це тарка ПФО-со сывель производстванть коряс. Республикась аволь ансяк целанек пешти прянзо сывельсэ, ловсосо, алсо ды эмежтнесэ, истя жо пачти сынст лия регионтнэс.
2021 иень урожаенть туртов республикань аграрийтне ютавтсть 150 тежат тоннат минеральной удобреният. Сы иень урожаенть туртов арсеви рамамс 155 тежат тоннат - неень шкане республикань хозяйстватнес уш пачтязь 60 тежат тоннат.
Мордовия Республикань Прявтонь пресс-службась