Чадыковонь 10-це чистэ Саранскойсэ «Мордовия Арена» стадионсонть ютавтовсь ялгаксчинь гала-матч Мордовиянь сборноенть ды «Амкал» футболонь клубонть ютксо. Паксясонть, косо ютавтовсть масторлангонь чемпионатонь матчтне, вастовсть Россиянь спортонь легендатне, футболонь содавикс обозревательтне ды блогертнэ. Мордовиянь команданть прявтсо ульнесь республикань Прявтонь тевтнень топавтыцясь Артём Алексеевич Здунов, тов истя жо совасть содавикс футболисттнэ Егор Титов ды Дмитрий Аленичев. Прявт судьякс ульнесь Мордовия Республикань Футболонь федерациянь президентэсь Александр Егоров.
«Амкал» футболонь клубонть 2018 иестэнть пурнызе Герман Попков, El Classico блогерэсь. Те блогерэнь проект, конасонть примить участия социальной сеттнесэ содавикс ломантне, конат невтить, сынь маштовить аволь ансяк матчтнень обозревателекс, истя жо парсте налксить. «Амкал» командантень совицятнень ютксто ламотнень арась профессиональной спортивной анокстамост. Сынь а бажить понгомс покш футболс, ансяк вечкевить ламот тёжат од ломантненень, стадионтнэ свал пешксеть ваныцятнеде.
Саранскойсэ субутасто погодась ульнесь аволь вадря – вете градуст лембе, валсь пиземе весе матчонть перть. Ансяк те эзь меша командатненень невтемс мельстуиця налксема, организатортнэнь ловомаст коряс матчонтень сакшность малав 10 тёжат ваныцят. Прявт шкась прядовсь 6:6 счетонть марто. Васенце голонть 6-це минутастонть чавизе Артём Здунов. Мордовиянь лидерэсь истя жо топавтсь пенальти дополнительной шкастонть. Налксемась прядовсь 8:10 счетонть марто «Амкалонть» лезэс.
Налксемадонть мейле ютавтозь пресс-конференциясонть яволявтозель соперниктнень футболонь паксясонть матч-реваншонь ютавтомадо арсематнеде.
Мордовия Республикань Прявтонть пресс-службась