Сундерьковонь 24-це чистэ Мордовиянь Прявтось Артём Здунов ВКС-нть лувсо ульнесь РФ-нь уголовно-исполнительной системань исправительной куншкакуротнень сеттнень виевгавтомань кевкстематнень коряс промкссонть, конань ветизе Россиянь Юстициянь министрась Константин Чуйченко. Республикань руководителесь кортась промкссонть Мордовиясо исправительной куншкакуротнень сеттнень виевгавтомань кевкстеманть коряс.
Константин Чуйченко ледстизе, Россиянь Федерациянь Безопасностень Советэнть решениянзо коряс регионтнэнень кармавтозь 2024 иенть видьс келейгавтомс исправительной куншкакуротнень сетенть (принудительной важодематнень топавтомаст туртов).
"Принудительной тевтнес ютамось лезды чумондозетненень велявтомс обществасо свалшкань эрямонтень, муемс важодема трудонь договоронть коряс, одкстомтомс семиянть марто сюлмотнень. Уш ней нейтяно, исправительной куншкакуротнеде мейле рецидивтне киртявсть нилексть, бути ваномс чумондомань лия видтнэнь", - тешкстызе Чуйченко.
Юстициянь министрась явсь мель: регионтнэнь туртов исправительной куншкакуротнень теемась лезды муемс а сатыця важодицянь кедьтнень.
"Принудительной важодемась - те чумондома, конась апак сюлмаво олячинь саеманть марто. Ломантне важодить коммерческой компаниятнень эли региононь хозяйствань организациятнень юрсо. Седе мейле, кода чумондозетне ютасызь принудительной тевтнень коряс шканть, сыненст мереви кадовомс важодеме секеть предприятиятнесэ", - мерсь Чуйченко.
Промкссонть Россиянь Федерациянь субъекттнэнень кармавтозь ладямс тевдееманть принудительной тевтнень вельде чумочинт печтямонь условиятнень тееманть туртов. Арсеви, 2022 иентень теевить малав 20 тежат таркат, косо кармить важодеме принудительной тевтнес чумондозетне (малав 400 важодемань таркат эрьва регионсонть). 2024 иентень - 80 тежат важодемань таркат весе масторонть келес.
Артём Здунов эсь кортамосонзо тешкстызе, регионось уш вети те тевдееманть. Колмоце ие 8№ колониясонть-поселениясонть теезь изолированной участка, тосо важодить принудительной тевтнес 43 чумондозетне. Те категориянть туртов теезь 50 важодемань таркат "Ромодановсахар" предприятиясонть.
Мордовиянь Прявтось евтнесь исправительной куншкакуротнень теемань коряс проекттнэнь топавтомадост - Зубова Полянань ёнкссо Вышинской чувтонь обработкань комбинатонь изолированной участкасонть, икелень 22№ ды 13№ колониятнень юрсо.
Истя жо арсеви теемс изолированной участка Саранскойсэ. Артём Здунов кармавтсь тонавтнемс масторонь лия регионтнэсэ истят куншкакуротнень теемань коряс сехте вадря практикатнень.
Мордовия Республикань Прявтонь пресс-службась