Чадыковонь 12-це чистэ Мордовиянь Прявтонь тевтнень топавтыцясь Артём Здунов ульнесь «Классонь вастовомат» весероссиянь проектсэнть, конань ютавты Россиянь школасо тонавтницятнень движениясь. 2019 иестэнть сон кармась «Образование» нацпроектэнь пельксэкс. «Классонь вастовоматнесэ» проектэнь участниктне вастовить содавикс ломантнень марто ды кортыть од ломантнень талновтыця кевкстематнеде.
Мордовиянь Прявтонь тевтнень топавтыцясь тешкстызе, меельце иетнестэ РДШ-сь эрязасто виевгавтови регионсонть. Топавтозь тонавтомань ды общественной ламо проектт. "Тынь ламот съездтнэнь ды форумтнень участникть. Тынк ламо проектэнк - те явовты мель. Тынк эрямонк алкуксокс мельстуиця, весемесь лаказь лаки! Течи миненек эряви чаркодемс, кода минь карматанок важодеме седе тов Мордовиясо! Эряви кортамс сы шкань проекттнэнь. Сехте прявтось - чаркодемс, мейсэ лездамс Россиянь школасо тонавтницятнень движениянтень", - мерсь Артём Алексеевич.
Движениянь участниктне макссть республикань руководителентень ламо кевкстемат. Вейкесь эйсэст токшесь Мордовиянь Прявтонь тевтнень топавтыцянть школасо тонавтнеманзо. Артём Здунов ёвтнесь, од шкасто эрязасто топавтсь общественной тевдееманть, ульнесь пионерэнь "тештинень" прявтокс. Свалшкане пелькстась спортонь состязаниятнесэ. Мордовиянь Прявтонь тевтнень топавтыцясь мерсь школасо тонавтницятненень явомс мель физкультурантень ды спортонтень: "Те алкуксокс вейсэнди, командань коряс ялгатне ванстовить весе эрямонть перть!"
Евтазельть талновтыця кевкстематкак. Истя, Саранскойсэ РДШ-нть улить нупалензэ важодеманть ды мероприятиятнень ютавтомаст туртов. Районтнэсэ арасть. Те кевкстемась ули ваннозь муниципалитеттнэнь прявттнэнь марто. Истя жо Артём Алексеевичень энялдсть кирдемс сы шкань проекттнэнь. "Лиясто эрявить аволь ламо ярмакт, лиясто жо эряви лездамс ансяк административна, ды проектэсь нолдави. Минь ванносынек финансонь пельксэнть. Паряк, лезксэсь карми явовомо гранттнэнь вельде", - мерсь Мордовиянь Прявтонь тевтнень топавтыцясь.
Школасо тонавтницятне истя жо евтнесть, сынь ветить ероков тевдеема ламот социальной сеттнесэ. Ансяк Tik-Tok-со Мордовиянь РДШ-нь аккаунтось пурнась миллион ванномат. Вастовоманть прядовомсто Артём Здунов примась участия те площадканть туртов клипенть снимамсто.
Мордовия Республикань Прявтонть пресс-службась