Мордовиянь Прявтось Артём Здунов якшамковонь 20-це чистэ ютавтсь вастовома Индия Республикасо РФ-нь Чрезвычайной ды Полномочной посолонть Денис Алипов марто. Кортавсть вейсэнь важодемань виевгавтомань кевкстематне, истя жо микшнемань-экономикань коряс.
Мордовия Республикасо важодемань коряс улемстэ Чрезвычайной ды Полномочной посолось теевсь содавиксэкс региононь возможностнень марто, якась зярыя предприятиятнес, Мордовиянь Технопаркс, Мордовиянь госуниверситетс, вастневсь республикань бизнес-вейсэндявксонь представительтнень марто.
Мордовиянь Прявтонть марто кортамсто Денис Алипов яволявтсь вейсэнь важодемань од енкстнэнь ладямодо анокчиденть.
"Кемеде минек лезксэнть лангс, - мерсь посолось. - Карматано тееме весементь, мезесь ашти минек эйсэ".
Мордовиянь руководителесь тешкстызе, республикась панжадо од сюлмотнень туртов.
Ледстясынек, 2021 иень умарьковсто Мордовияв сакшнось Индиясто делегациясь, сынст прявтсоль Россиянь Федерациясо Индия Республикань Чрезвычайной ды Полномочной посолось Д.Б. Венкатеш Варма. Региононь Правительствась анокстась агропромышленной комплекссэнть, промышленностенть, культурань-туристэнь енкстнэнь коряс вейсэнь важодемадо мельть-арсемат. Ваннови Московсо Индия Республикань Посольствасонть Мордовия Республикань Читнень ютавтомадо кевкстемась.
Вастовомасонть ульнесть Мордовиянь пельде сенаторось Сергей Кисляк ды республикань Правительствань Председателесь Владимир Сидоров.
Мордовия Республикань Прявтонь пресс-службась