Артём Здунов вастовсь Мордовия Республикасо «Ростелеком» ПАО-нь филиалонь од прявтонть марто

Артём Здунов вастовсь Мордовия Республикасо «Ростелеком» ПАО-нь филиалонь од прявтонть марто

Медьковонь 19-це чистэ Мордовия Республикань Прявтонь тевтнень топавтыцясь Артём Здунов ютавтсь вастовома МР-сэ «Ростелеком» ПАО-нь филиалонь прявтонть Владимир Суховеев марто. Вастовомасонть кортавсть республиканть ды провайдерэнть ютксо вейсэнь важодемань кевкстематне.

Ваннызь «Интеллектуальный безопасный регион» ды «Безопасный город» проекттнэнь топавтомаст. Истя жо кортамось мольсь «Устранение цифрового неравенства» программадо, сонзэ вельде «Ростелекомось» стявты 2G ды 4G технологиятнень коряс сотовой связень базовой станцият сеть велетнесэ, косо эрить 100 саезь 500 ломанть. Те иестэнть арсеви ладямс 8 истят таркат. Медьковсто прядыть стявтомо Ельникинь ёнкссо кавто велетнесэ: Новоямской Слободасо ды Старотештелимской Выселкасо.​

Башка кортасть интернетэнь ветямодо социальной объекттнэс – ФАП-тнес, культурань ды тонавтомань учреждениятнес. Тедеде Интернет ветить 252 учрежденияв, ветить связень волоконно-оптической линиянь 396 вайгельбеть. Проектсэнть арсеви, оптической волокнась ветяви 704 организацияв. Артём Здунов тешкстызе, региононть туртов те пек эрявикс программа – паро интернетэсь лезды кастомс услугатнень максоманть, седеяк пек велетнесэ.

Мордовия Республикань Прявтонь Пресс-службась