Те иенть ушодовомсто саезь районось невти вадря динамика зярыя енкстнэнь коряс. Кассть местной бюджетс налогонь ды аволь налогонь пачтямотне. Васенце кварталстонть инвестициятнень касомань темпась кармась 122% ютазь иень теке шканть коряс. Истя жо тешкстазель, малав 16% районсонть кассь средней зарплатань невтевксэсь.
Константин Николаев евтнесь республикань руководителентень: ули вадря касома эрямо таркатнень строямонть коряс. Тетюши велесэнть моли «Комплексное развитие сельских территорий» госпрограмманть коряс эрямонь таркатнень строямось: мелят тесэ максозь колмо эрямонь кудот, строяви эште вейке кудо, кавтотнень лангс кучозь башка яволявтома РФ-нь Минсельхозов. Истя жо Отяжбуень енкссонть топавтови варчамонь проект уроз-эйкакштнень туртов башка кудотнень стявтоманть коряс. Эрямонь таркатнень марто вейсэ максови модань участкаяк.
Мордовиянь Прявтось кармавтсь райононь руководителентень седе эрязасто примамс участия грантонь лезкс марто од ломанень проекттнэсэ. Неень шкане Н. П. Огарёв лемсэ МГУ-нть марто вейсэ анокстави проект Ламбаське велесэ чачозь воинтнэнь уцяскадост музеень ды книгань тееманть коряс. Те историянь ледстнематнень ванстомань ды эйкакштнень патриотизмань лувсо тонавтомань-превс путомань вадря невтевкс.
Социальной эрявикс эште вейке проектэсь сюлмавозь Отяжбуесэ муниципальной театрань тееманть марто. Истямо ушодкс марто пшкадсь «Талина» компаниятнень группань руководителесь Виктор Бирюков, сон прими эряза участия райононть виевгавтомасо, истя жо инвестициянь од проекттнэнь топавтоманть вельде. Региононь Прявтось кирдизе те ушодксонть, тешкстызе: сы шкасто театрасо важодеманть туртов эряви тердемс госуниверситетэнь Раськень культурань институтонь студенттнэнь.
«Районсонть эрямось улезэ мельстуицякс эрицятнень ды инжетнень туртов. Потенциалось тынк тень туртов вадря – те паро важодемань таркат, покш социально ориентированной бизнес, социальной инфраструктурань улемась», – тешкстызе Артём Здунов.
Мордовия Республикань Прявтонь пресс-службась