Региононь бизнес– омбудсменэсь невтизе республикань руководителентень эсь тевдеемань коряс эрьва иень пачтямонть.
Елена Юрченкова тешкстызе: 2023 иестэ предпринимательтнень пельде састь 180 пеняцямот ды пшкадемат – те седе аламо икеле иенть коряс. Омбудсменэнть ванновтонзо коряс, те редявикс киртямось – республикасонть властень весе органтнэнь бизнесэнть марто свалшкань ды лезэнь кандыця важодемань цетавкс.
Вастовомасонть кортасть сеедьстэ вастневиця кевкстематнеде, конатнень марто предпринимательтне пшкадекшныть Уполномоченноентень. Сынь токшить модань-ули-паронь отношениятнень, налогонь администрированиянть, контролень-надзоронь органтнэнь пельде ванноматнень.
Пачтямосонть, конань невтизе МР-со Предпринимательтнень праваст коряс уполномоченноесь, евтазь мель примамс «О семейном предпринимательстве» Мордовия Республикань Закон, совавтомс полавтомат МР-нь важодемань династиятнень коряс положениянтень, домкалгавтомс сонзэ «предприниматель» профессиясонть.
Вастовомасонть истя жо кортасть кевкстнематнень невтевкстнэде, конатнень 2023 иень сундерьковсто ютавтынзе РФ-нь Президентэнть пингстэ Предпринимательтнень праваст ванстомань коряс уполномоченноесь.
Мордовия Республикасо 64% кевкстнезь бизнесэнь представительтне прявт стакачикс неить кадрань кевкстеманть. Малав 70% предпринимательтне неень шкане виевгавтыть ды келейгавтыть эсь бизнесэнть.
Мордовиянь Прявтось тешкстызе предпринимательтнень ды властень органтнэнь ютксо седе тов кортамонь, истя жо республикасонть бизнесэнь ветямонть туртов вадря условиятнень теемань эрявиксчинть. Меельце колмо иетнень перть Мордовиясо редявикстэ ламолгадсть МСП-нь субъекттнэ ды самозанятойтне.
Мордовия Республикань Прявтонь Пресс-службась