Мордовиянь Прявтонть тевтнень топавтыцясь Артём Здунов панжиковонь 12-це чистэ важодемань содавтома марто сась Атюрьевань енксов. Райононть марто содавтоманть республикань руководителесь ушодызе Мордовско-Козловской велень поселениястонть, тесэ сон ульнесь велень хозяйствань предприятиянь ракшань кирдемань коплекссэнть, истя жо якась социальной куншкакуронтень, тосо вейке лато ало важодить культурань кудо, эйдень кужо, ФАП, библиотека, почта ды велень администрация. Куншкакурось строязь 2010 иестэнть велень территориятнень виевгавтомань программанть коряс.
Школань стадионсонть Артём Здунов вастневсь од футболисттнэнь марто. Школасонть тонавтнить малав 60 эйкакшт, весемезэ велень поселениясонть эрить 600 ломанть. Республикань руководителенть марто кортамсто велень эрицятне ёвтнесть, кода эри велесь, энялдсть лездамс велень хозяйствань предприятиянтень, косо важодить 35 ломанть.
Атюрьевань райононь центрасонть Артём Здунов ваннызе парконь витнеманть, 90 таркас од эйдень кужонть, конась анокстави панжомантень, истя жо од куронть, косо стявтовить кудот, истя жо государственной программатнень коряс. Тесэ анокстазь модань 68 участкат, ветязь газ, ведь, валдо, строязь 13 кудот. Од семиятне энлядсть Мордовиянь Прявтонть тевтнень топавтыцянть лездамс кинь строямонть марто.
Райононь центрасонть республикань руководителесь истя жо кортась эрицятнень марто, кунсолынзе сынст энялдомаст, ламотне кортасть китнень строямодост ды медицинань обслуживаниядонть. Артём Алексеевич кармавтсь виевгавтомс райононь поликлиниканть специалисттнэсэ «Земский доктор» программанть коряс.
Мордовия Республикань Прявтонть пресс-службась