«Магма» компаниятнень группась 2022 иестэ ушодсь строямо цементэнь завод, проектэнть арсеви топавтомс малав 5 иетнень перть. Сонзэ вейсэнь питнесь ловови 200 млн долларт.
Мордовиянь Прявтось ваннызе строямонь молеманть. Производствасонть теевить 120 важодемань таркат, средней зарплатась карми 110 тежат целковойть ковозонзо.
«Магма» КГ-нь прявттнэнь советэнь председателесь Сергей Сиушов евтнесь, предприятиянть виензэ кармить 1200 тежат тоннат цемент иезэнзо. Те саты, штобу пекстамс 400-500 вайгельбетнень маласо стройкатнень вешематнень.
«Минь нейтяно рынканть, конась лезды тенек микшнемс нолдавиця продукциянть», – тешкстызе Сергей Сиушов.
Цементэнь заводонть туртов энергиянь лисьмапрятнестэ вейкекс карми альтернативной уштомапелесь, ТКО-сто сонзэ производствань коряс линиянть истя жо арсеви ладямс Мордовиясо.
Оборудованиянь прявт пачтицясь – Китайстэ производителесь. Ней строямонь площадкасонть важодить Китаень специалисттнэ, Турциянь компаниянть марто вейсэ сынь ветить строямонь пельксэнть. Республикань Прявтось истя жо ваннынзе эрямонь-аштемань условиятнень, конат теезь омбо масторонь специалисттнэнь туртов.
Ванноманть прядовомга Артём Здунов тешкстызе региононь экономиканть туртов инвестициятнень эрявиксчинть ды макссь покш питне топавтовиця проектэнтень.
«Строямонть эряви бажамс прядомс курок – эрьва чись те ярмакт. Текень марто а эряви стувтнемс раськеютконь вейсэнь тевдеемадонть омбо масторонь важодицятнень ежост кепетеманть туртов, – тешкстызе Артём Здунов. – Весе масторонть келес строямонь рынкась невти касома, Мордовиясо минь истя жо ламолгавтано социальной объекттнэнь ды эрямонь таркатнень строямонть. Секскак цементэсь, конась тесэ карми нолдавомо, кеман, карми пек эрявикс. Неян, важодемась тесэ моли пек покш уровнясо».
«Магма Цемент» площадкасонть истя жо ютавтовсь республикань Прявтонть «Магма» КГ-нь прявттнэнь советэнь председателенть Сергей Сиушов марто важодемань вастовомась. Кортасть компаниянь инвестпроекттнэнь топавтомадост ды КГ-нь седе тов виевгавтомадонть, истя жо логистикань рисьметнень ладямодост ды миемань од рынкатнень саемадост.
Ледстясынек, МАГМА компаниятнень группась – Россиясо сехте покш вейсэндязь предприятиятнестэ вейкесь, тарги модапотмонь сюпавчинть, нолды ды микшни строямонь ды отделочной материалт. «Магма» брендэнть ало продукциясь сови масторонь вете сехте вадря производительтнень юткс ды ловови строямонь материалтнэнь коряс прявт экспортерокс. Заводтнэ важодить икеле молиця технологиятнень коряс, продукциясь лади вадрячинь сехте покш стандарттнэнень, «Магма» брендэсь эрьва ие кемексты эсь тарканзо Россиянь ды СНГ-нь мастортнэнь строямонь кластерсэнть.
Мордовия Республикань Прявтонь Пресс-службась