Мордовия Республикань Прявтонть тевтнень топавтыцясь Артём Здунов чадыковонь 30-це чистэ, Тундонь ды Трудонь кенярксчинть каршо, явшесь знамят важодемань соперничествань коряс республикань пелькстамотнесэ изницятненень. Коень коряс сынь ютавтовить промышленностень, строительствань, микшнемань, транспортонь, связень, вишка предпринимательствань, агропромышленной комплексэнь, тонавтомань, здравоохранениянь ды культурань енкстнэсэ.
Изницятненень пшкадемстэ, республикань руководителесь тешкстызе, важодемань соперничествань коряс пелькстамось - Мордовиясо сехте вадря койтнестэ вейкесь. "Течи минь чествоватанок профессионалтнэнь, профессиясо сехте вадрятнень. Тынь - минек каштанчинек! Евтан сюкпря тенк сень кисэ, апак вано весе стакачитнень лангс, тынь невтядо эсенк маштомачинк. Тынь аштетядо виев конкуренциянь условиясо, нолдатадо вадря товарт, явтадо вадря услугат, касстадо прибыленть, пандтадо налогт, конат молить республиканть виевгавтомс ды социальной тевтнес. Профессионалтнэнень свал максови покш питне куш кона тевсэнть. Арсян тенк пря велькссэ сэтьме менель, паро тевть, чарькодема, вейсэндявома ды важодемань ялгаксчи", - мерсь Артём Здунов.
Региононь руководителесь тешкстызе, Мордовиясь састыне карми важодемань профессиятнень чемпионатонь участникекс. "Ули арсема: Саранскоесь кармазо минек масторсо рационализациянь ды изобретательствань куншкакурокс. Минь ютавтынек васенце съезд ды саинек эсенек лангс варчамонь те функциянть. Минь, нама, карматанок лездамо Ворлдскилс движениянтень", - тешкстызе МР-нь Прявтонть тевтнень топавтыцясь.
Пелькстамонть лувсо питне максовсь явозь услугатнень покшолмантень, выручкантень, продукциянь ассортиментэнтень ды, нама, зарплатань покшолмантень. Изницятнень ютксо региононь аволь ансяк покш компаниятне, истя жо, невтемакс, Ташто Шайговань енкссто «Колобок» пекарнясь. Мелят миезь продукциянь покшолмась кармась 56 миллиондо ламо целковойть, ассортиментэсь кастовсь 233%, средней зарплатась кармась 27 тежат целковойть. «Колобок» ООО-нь, «Тепличное» АО-нь, «ТРАНС-СЕВЕР» АО-нь Артём Здунов пачтясь знамят свалшкань ванстомас, секс мекс сынь колмоце ие лиссть важодемань соперничествань изницякс.
Течи чествовизь Гусевтнень династиянть. Сынь важодить «Ковылкинань электромеханической заводсонть», семиянь вейсэнь стажось - 163 иеть. Династиянь прявтонтень Иван Викторович Гусевнень региононь руководителесь казсь почетонь диплом ды «Лучшая трудовая династия РМ» тешкс. Династиянь эрьва членэнтень пандозь премия 1000 целковоень покшолмасо важодезь эрьва иенть кисэ.
Артём Здунов ёвтась поздоровт пелькстыцятненень изнямонть, сыця кенярксчитнень кувалма ды арсесь ютавтомс панжиковонь оймсема читнень семиянть ды малавикстнэнь вакссо, а стувтомс санитарно-эпидемиологической вешематнеде.
Мордовия Республикань Прявтонть пресс-службась