Медьковонь 20-це чистэ Республикань Кудосо ютась «Село. Территория развития» Общероссийской народной фронтонь проектэнь Кругловой столь экшсэ промкс. Сонензэ явсть мель Мордовиянь Прявтонь тевтнень топавтыцясь Артём Здунов; ОНФ-нь центральной штабонь членэсь, «Село. Территория развития» проектэнь координаторось, велень од ломантнень Россиянь союзонь председателесь Юлия Оглоблина; ОНФ-нь центральной штабонь членэсь, РФ-нь Торгово-промышленной палатань президентэсь Сергей Катырин, ды истя жо ВКС режимсэ – федеральной министерствань представительтне, масторонь агропромышленной секторонь, научной сообществань, общественной вейсэндявксонь важодицятне.
Велетнень кастомань-кепетемань темась – пек эрявикс кода федеральной уровнясо, истя жо регионтнэсэяк. Юлия Оглоблина ёвтась истят цифрат: 2008 иестэ саезь 2021 иес велестэ тусть малав 2 млн. ломанть. Масторсонок 2021 иень якшамковонь 1-це чинтеь велень эрицятнеде ульнесть 36,9 млн. ломанть. Тень пингстэ велетнень виевгавтомаст ды аграрной производствань коряс федеральной программатне аволь сатышка важодить велень эрицятнень миграциянть коряс.
Мордовиянь Прявтонь тевтнень топавтыцясь Артём Здунов тешкстызе: ломантнень велесэ кадовомга, эряви аволь ансяк паро инфраструктура – улевель самореализация, сон касоволь профессиональной ёндо. «Нама, велень эрицятнень миграциянь стакачись ули, секскак эряви важодемс тень коряс, - мерсь Артём Здунов. – Эряви седе эрязасто явомс мель госпрограмматненень, сынст ютксо «Земский доктор» ды «Земский учитель», эрявить панжомс важодемань таркат, кастомс раськень промыслань ды ремеслань енксонть. Карматано важодеме!»
Россиянь Торгово-промышленной палатань президентэсь Сергей Катырин тешкстызе, велетнень касомась-кепетемась – те, нама, вейсэнь аравтлув – весе министерстватнень, аволь ансяк Минсельхозонь, федеральной торгово-промышленной палатась анок важодемс весе енкстнэстэ коллегатнень марто велесэ бизнесэнь виевгавтомань коряс.
Велетнень касомаст-кепетемаст коряс кортасть эрьва кодамо енксонь инжетне, сынст ютксо «Од веле» Мордовиянь общественной вейсэндявксонь прявтось Евгений Ледяйкин. Промксто мейле весе мельтне-арсематне кучовить федеральной министерствава, косо кемекстыть велень эрицятнень туртов лездамонь тевть.
Мордовия Республикань Прявтонь Пресс-службась