Неть читнестэ Мордовиянь Прявтонь тевтнень топавтыцясь Артём Здунов ёвтынзе арсеманзо республикасонть «Комплексное развитие сельских территорий» госпрограмманть топавтомадонзо. «Ульнинь Мордовиянь ламот ёнкстнэсэ ды ёвтаса, минек производстватнень ды фермертнэнь ули потенциалост виевгавтоманть туртов. Лездатанок лисемс тенст од уровнянтень. Карматанок эрязасто нолдамо тевс «Комплексное развитие сельских территорий» РФ-нь Минсельхозонь программанть. Вадрялгавтсынек велетнень, строятанок од кудот специалисттнэнь туртов. Те эряви республиканть касоманзо-кепетеманзо туртов», - тешкстызе региононь руководителесь.
Республикань Минсельхозонь невтевкстнэнь коряс, 2020 иестэнть теезь 117 вайгельбеть локальной водопровод, 17 вайгельбеть газонь ды 2 вайгельбеть электрической сетть, 14 вайгельбеть автомобилень кить. Ташто Шайгова велесэнть строязь Культурань куншкакуро, витнезь эйдень кужо, Лямбирьсэ педе пев витнезь Культурань кудось. Анокстазь 562 модань участкат эрямо таркатнень строямост туртов. Программанть вельде, ков сови велень льготань ипотекась, эрямонь условияст вадрялгавтызь 620 семият. 84 грантт явозь велетнень вадрялгавтомс, сынст вельде истя жо строязь эйкакшонь налксемань ды спортонь 62 площадкат, витнезь Ине Отечественной войнасо маштовозетненень путозь 14 кеврунгот, топавтозь 5 проектт оймсемань таркатнень теемаст туртов, путозь колмо площадкат коммунальной калгодо отходтнэнь пурнамост туртов.
2020 иестэнть инвестициятнень вейсэнь покшолмась кармась малав 2 млдр целковойть. Зяро жо ярмакт арсеви путомс тедеде Мордовиянь велетнень виевгавтомс. Строявить 2,5 вайгельбеть газонь ды 40 вайгельбеть ведень сетть, топавтовить 40 ламо проектт велетнень вадрялгавтомань-мазылгавтомань коряс. Краснослободской ёнксонь Бобылевские Выселки велесэнть прядови спортонь комплексэнь строямось, ков совить укшномань кавто бассейнат, эень арена, спортонь универсальной зал. Арсеви панжомс укшномань бассейна Орданьбуесэ, культурань ниле од кудот, стадион Дубёнкань ёнксонь Кочкурова велесэ.
Мордовия Республикань Прявтонть пресс-службась