Таштамковонь 17-це чистэ Республикань культурань кудосонть ютавтовсь «Время героев» народной омбоце премиянь лауреаттнэнь каземань церемониясь.
Ледстясынек, проектэсь топавтови Культурань ушодкстнэнь президентэнь фондонть лезксэнзэ пингстэ.
Кода мерсь Артём Здунов, премиясь кармась народноекс, тедеде вайгелест максызь малав 200 тежат ломанть. «Эрьва ломаненть улить эсензэ героезэ – те минек тетянок-аванок, ялганок, сеть, кить минек ванстыть, кинень минь кемтяно. Минь теинек те премиянть, штобу улемс паронть ено, – мерсь Мордовиянь Прявтось. – Те залсонть течи монь тонавтыцян, евтан тенст сюкпря, сынь монь геройть, секс мекс 90-це иетнестэ кадовсть эсест таркатнесэ, тонавтсть-путсть превс пек ламо вадря ломанть. Лован тень геройствакс – а туемс эсеть фронтстонть, эсеть таркастонть натой сехте стака шкастонть. Эряви кирдемс каштанчи минек тевтнень кувалма».
Изницятнень каземань церемониядонть икеле Артём Здунов явшесь государственной наградат. Россиянь Федерациянь Президентэнть Указонзо коряс воинской долгонть топавтоманзо пингстэ невтезь мужестванть ды а пелемачинть кисэ Мужествань орденсэнть куломадонзо мейле казезь Василий Королев – Покш Березникень енксонь Ташто Наймант велесэ чачозесь.
Россиянь Федерациянь Президентэнть Указонзо коряс боевой условиятнесэ тевтнень топавтоманть пингстэ невтезь отваганть ды а пелемачинть кисэ «За отвагу» медальсэ казезь Максим Абросимов, чавовсь воинской долгонь топавтоманть пингстэ – Покш Игнатовань енксонь Ташто Кшуманця велесэ чачозесь. «За отвагу» медальсэнть сон казезь эште эрямонзо пингстэ, ансяк сонзэ эзть кенере максомс. Чавовозь геройтнень наградатне пачтязь малавиксэст туртов.
«Герой нашего времени» специальной премиясонть казезь СВО-нь участниктне Алексей Конов, Иван Волков, Миразым Исмаилов, истя жо врачось Кирилл Левкин.
«Герои по призванию» номинациясонть изницякс кармась Людмила Кирдяшова – толонь мадстемань-идемань спортонь коряс масторлангонь 12-ксть чемпионкась ды Россиянь авань сборной командань капитанось, полицейскойтнень ды толонь мадстицятнень ютксо Европань ды Масторлангонь налксематнень ламоксть изницясь.
«Герои воспитания» номинациясонть изнясь Дмитрий Глебочкин - «Центр детского творчества № 2» дополнительной образованиянь педагогось, сон анокстась ды ютавтсь спортонь 20 седе ламо маршрутт, истя жо Тянь-Шанев, Уралов, Алтаев, Хибинав, Центральной Кавказов маршрутт, тонавтсь-путсь превс тонавтницятнень зярыя категорият, конат ней важодить тонавтыцякс, тренерэкс, МЧС-нь сотрудникекс.
«Герои правопорядка» номинациясонть изнясь Виталий Баранов, 2020 иень таштамковсто палыця кудостонть ливтизе инвалидность марто церанть.
Добровольчествань героекс кармась Ромодановань енксонь Курмачкасы велестэнть Галина Созаева -Захар Прилепинэнь фондонь волонтёрось. Кавто ковт важодсь Луганской народной республикасонть – пачтясь гуманитарной лезкс, лездась пурнамс ярмакт УАЗ автомобиленть рамамс, конань пачтизе СВО-нь таркантень Мордовиясто боецтнэнень.
«Герои семьи» номинациясонть изнясть Ташто Шайговасто Александр ды Ольга Котькинтнэ, «Герои семьи. Династия» социальной номинациясонть – Отяжбуень енкссто Владимир ды Мария Феофановтнэ.
Социальной важодемань героекс кармась Ташто Шайговасто Елена Малыженкова.
«Герои по зову сердца» номинациясонть изнясь Владимир Захарин. 2021 иень умарьковсто Отяжбуень енксонь Русские Дубровки велесэнть идесь ведьстэ ломань.
Медицинань героекс кармась Александра Чарышкина - Эйкакшонь республиканской клинической больницянь анестезиологось-реаниматологось.
Печтямонь-цидярдомань героекс кармась Даяна Паршакова – поэтессась, Темниковань кудосонть-интернатсонть эрицясь.
«Герои образования» номинациясонть изнясь Галина Алямкина – Ковылкинань 3№ школань рузонь келень ды литературань тонавтыцясь, «Герои науки» номинациясонть - Лариса Балыкова – Н. П. Огарёв лемсэ МГУ-нь медицинской институтонь прявтось.
Производствань героекс кармась Светлана Тараканова - «ВКМ-СТАЛЬ» заводонь машинистэсь, «Герои производства. Наставник» специальной номинациясонть изнясь Иван Дьяков - «Мордовский бекон» ЗАО-нь агрономось.
Спортонь героекс кармась Руслан Бичурин – Алексей Мишинэнь лемсэ спортивной бороцямонь ды дзюдонь коряс олимпийской резервань спортивной школань бороцицясь, греко-римской бороцямонь коряс ды каркстнэсэ бороцямонь коряс Россиянь спортонь мастерэсь, 2022 иень Россиянь сехте виев спортсментнэнь спартакиадань чемпионось.
«Герои культуры» номинациясонть изнясь Андрей Бочканов - Мордовской государственной филармониянь солистэсь,«Герои экологии» номинациясонть - Ольга Ручина, «Зеленый мир» экологиянь организациянь руководителесь, «Герои зоозащиты» номинациясонть - Юлия Потапова.
«Герои села» номинациясонть изнясь Павел Шершаков – «Ресурс» агропромышленной комплексэнь руководителесь ды блогерэсь.
«Герои меценатства» номинациясонть изнясь Владимир Кабаев – фермерэсь-паронь теицясь. Сон яви ярмаконь лезкс шумбрачинь киртязь возможность марто ломантненень, нужасо эриця семиятненень, одкстомтызе Ине Отечественной войнань солдаттнэнь кеврунгонть, рамась оборудования райононь школань медицинань кабинетэнть туртов. Владимир истя жо кучсь Покш Игнатовань енкссо эсь фермастонть ловсонь миемань кисэ саезь ярмакт земляктненень, конат примить участия СВО-нть.
Ледстнематнень ванстомань героекс яволявтозь Игорь Лошкарев, 20 иеде ламо икеле тейсь «Владычный полк» исторической реконструкциянь ды средневековой фехтованиянь клуб.
Каземань церемониясь невтизе: геройтне – минек ютксот, сынь важодить минек вакссо, алкуксокс топавтыть эсь тевест, кемить паронтень, видечинтень, а ютыть эсь визьксэнть каршо ды тонавтыть тенень эсь эйкакштнень.
Кода тешкстызе «Время героев» проектэнь арсицясь-теицясь Денис Шапкарин, арсематнесэ – теемс премиянть регионъютконсекс.
Мордовия Республикань Прявтонь пресс-службась