Артём Здунов якась Дубенка енксонь Орданьбуе велентень

Артём Здунов якась Дубенка енксонь Орданьбуе велентень

Артём Здунов чадыковонь 17-це чистэ Дубенкань енкссо важодемань коряс улемстэ якась Орданьбуе велентень, косо ваннызе социальной куншкакуронь важодеманть, сон строязь «Устойчивое развитие сельских территорий» программанть коряс. Те проектэнть лувсо Орданьбуень велень поселениясонть 2017-2018 иетнестэ строязь спортонь площадка, вадрялгавтозь паркось, од курованть ветязь коммуникацият (газ, ки, ведь).

Социальной куншкакуросонть важоди велень поселениянь администрациясь, фельдшерэнь-акушерэнь пунктось, велень библиотекась, музыкань ды киштемань класстнэ, музеесь, 160 таркас актовой зал марто велень клубось. Клубонть юрсо ютавтовить концертт, массовой мероприятият, эрьва кодат кужинеть, дискотекат, пелькстамот. Кода евтнесть республикань руководителентень, Орданьбуе велень каштанчикс аштить «Эрзянь ава», «Лейне» ансамблятне, сынь ардтнить «Шумбрат, Мордовия» фестивалентень.

Мордовиянь Прявтонть тевтнень топавтыцясь кортась художественной самодеятельностень участниктнень марто, истя жо од артисттнэнь марто, макссь питне кедьчелькев ломантнень теевкстнэнень, теевсь содавиксэкс раськень ярсамопельтнень марто. Республикань руководителенть андызь "норовжорчто" - постной чапаксто панезь нармунть, коень коряс сынь паневить Ине постонть шкасто. Кезэрень коенть коряс, "норовжорчтнень" потс азораватне кекшить "салавачить". Мордовиянь Прявтонть тевтнень топавтыцясь муйсь потстонзо трешник. "Те невти, иесь республиканть туртов карми вадря!" - мерсть велень эрицятне.

Мордовия Республикань Прявтонть пресс-службась