Выставканть панжомасо ульнесь Мордовиянь Прявтось Артём Здунов. «Сюкпря тынк важодеме вечкеманть кисэ, минек республиканть лезэс тевдееманть кисэ, – мерсь региононь руководителесь. – Масторлангонь классонь те музейсэнть тынк пек покш путовксонк, тынк оймень путовксонк. Тынь покш ливтямонь нармунь – тынь важодтядо Мордовиянь эрицятнень, Россиянь эрицятнень лезэс. Честь, шнамонь валт ды карксамос сюконямо тенк тень кисэ!»
Людмила Нарбекова евтась сюкпря весе пурнавозетненень поздоровтнень ды лембе ежотнень кисэ: «Ули мелем эрямс, лексемс, топавтомс шкинемань тевть ды молемс икелев! Покш сюкпря тетянень-аванень ды монь тонавтыцятненень, монь семиянтень, истя жо музеенсентень».
Панжомань церемониядонть мейле инжетне ваннызь экспозициянть, ков совасть живописень ды графикань 50 седе ламо произведеният, конат топавтозь 1990-2020-це иетнестэ. Эрямодонть ды тиринь масторонтень вечкемадонть, кемемадонть ды семиядонть, ледстнематнень ды койтнень-кирдатнень ванстомадонть арсематне - Людмила Нарбековань шкинемань прявт смустесь. Сонзэ шкинемань масторонь башкачинть невти фольклоронь ды авангардонь човорявомась, абстрактноень ды фигуративноень вейсэндявомась. Артыцянть туртов шкинемань вийть максыть эрзятнень, мокшотнень, рузтнэнь татартнэнь декоративно-прикладной искусствань тешксэсь ды образной келесь.
Кенярксчинь панжоманть лувсо невтезель модной оршамопелень коллекциясь, конась теезь Людмила Нарбековань ветямонзо коряс. Тесэ сон пшкади эрзянь ды мокшонь раськень оршамопелень образной масторлангонтень. Истя жо невтезельть «Река времени» художественной анимационной фильмастонть саевкстнэ. Картинась теезь артыцянть произведениянзо лангс нежедезь «СОЮЗ ЭРЬЗЯ ФИЛЬМ. Межнациональное согласие» проектэнть лувсо – сон топавтови Культурань ушодкстнэнь Президентэнь фондонть лезксэнзэ пингстэ.
Тешкстасынек, Людмила Нарбекова 1985 иестэнть саезь – республикань, региононь, весероссиянь, раськеютконь выставкатнень участник. 30 седе ламо персональной мероприятият сон ютавтсь Россиясо ды сонзэ томбале. Сонзэ произведениянзо ванстовить С.Д. Эрьзянь лемсэ музейсэнть, Пензань картинань галереясонть, «Арт-Донбасс» художественной музейсэнть, Саровонь ды Геленджикень музейтнесэ. Людмила Николаевна евтызе истямо покш важодемань салавачинть ды эрямонь прявт лувонть: мезеяк а кадомс вандынь чинтень. «Ды, нама, монень лезды паронтень кемемась!» – евтнесь Людмила Нарбекова.
Мордовия Республикань Прявтонь Пресс-службась