Чадыковонь 12-це чистэнть, Космонавтикань чистэнть, региононь Прявтонь тевтнень топавтыцясь Артём Здунов телефононь коряс ёвтась поздоровт профессиональной кенярксчинть кувалма Россиянь Федерациянь Героентень, Мордовия Республикань почетонь гражданинэнтень, Зубова-Полянань енкссо чачозентень Владимир Дежуровнень. Ледстясынек, Владимир Николаевич 1995 иестэнть ульнесь «Мир» Россиянь орбитальной станциянтень рузонь-американь раськеютконь экспедициянь «Союз ТМ-21» космической кораблянь командирэкс. Тосо космонавттнэ ульнесть 79 чить ды веть. Се ливтямостонть Дежуров колмоксть лисекшнэсь панжадо космосов ды кавксть топавтсь важодемат разгерметизированной отсексэнть.
Владимир Николаевич Дежуров истя жо ёвтась поздоровт Мордовиянь эрицятненень Космонавтикань чинть кувалма. Сон мерсь: «Вечкевикс ялгат! Течи ёвтан тенк седейшкавань поздоровт космонавтикань чинть, те кенярксов, валдо, тундонь чинть кувалма! Те иесь юбилеень – космосов васенце ливтямонтень 60 иеть, ды минь келейстэ тешкстатанок те покшчинть. Шумбрачи, паро эрямо ды весементь сехте вадрянть! Кенярксчи марто! Космонавтикань чинть марто!»
Мордовия Республикань Прявтонть пресс-службась