Мордовиянь Прявтось, «Единая Россия» партиянь региононь отделениянь секретаресь Артём Здунов аштемковонь 8-це чистэ ульнесь кенярксчинь промкссонть, конась алтазель социальной важодицянь чинтень. Мероприятиясь ютавтовсь Рузонь государственной драмань театрасо.
Те ёнкссонть важодиця ломантнень профессионализмаст, ответственностест ды седеймарямост эйстэ ламосо ашти тёжат ломантнень эрямост вадрячись. Пособиятне, пандоматне, льготатне ды субсидиятне, адресной материальной лезксэсь, сыре ломантнень, инвалидтнэнь, эрямонь стака шкас понгозь эйкакштнень кудосо ды стационарсо обслуживаниясь, эйкакш марто семиятненень ды ламо эйкакшонь семиятненень лездамось – весе те социальной ванстомань важодицятнень тевдеемаст.
Мордовиянь Прявтось Артём Здунов тешкстызе те важодеманть эрявиксчинзэ. «Ломантнень марто важодемась - те сехте стака», - тешкстызе сон.
Россиянь Президентэнть Владимир Путинэнь решениянзо вельде редявикстэ виевгавтозь ламо эйкакшонь ды социальной апак вансто семиятненень социальной лезксэнь явомань тевтне, топавтови авакс улемань ды эйкакшпингень ванстомань политикась – «Семья» национальной проектэнть вельде, семиянть лангс нежедиця лувонь свалшкань топавтоманть ды корпоративной демографической стандартонь тевс нолдамонть вельде.
Течи весень башка ванновт ало - специальной военной операциянь участниктненень ды ветерантнэнень ды сынст семиятненень лездамось.
Сынст социальной сопровождениянть коряс комплексной важодемась ветяви «Защитники Отечества» Фондонть ды местной самоуправлениянь органтнэнь марто вейсэнь тевдеемасонть. «Сюкпря, сынь пшкадсть аволь ансяк кода профессионалт, истя жо весе оймесэст!» - мерсь Артём Здунов.
Эштё вейке прявт ёнксось – сыре ломантнеде мелявтомась. Меельце иетнестэ «Семья» нацпроектэнть вельде топавтозь покш важодема кудотнень-интернаттнэнь зданиятнень витнеманть коряс. «Зярыя иетнень перть минь одкстомтынек интернаттнэнь важодемаст - тень кувалма кирдян каштанчи, - тешкстызе Мордовиянь Прявтось. - Топавтозенть лангс а лотксетяно - неень шкане ютавтови Саранскоень кудонь-интернатонь корпустнэнь покш одкстомтомась ды педе-пев витнемась».
Мордовиянь Прявтось ёвтась сюкпря социальной важодицятненень цидярдоманть, чевте седеенть ды мелень явоманть кисэ, арсесь сэтьмечи ды паро эрямо.
Соцзащитань системань представительтненень поздоровт истя жо ёвтась Мордовиянь Госсобраниянь Председателень полавтыцясь Наталья Долматова. Сехте вадря важодицятненень явшезь казнеть.
«Ёвтан сюкпря Россиянь Президентэнтень ды Мордовиянь руководствантень минек важодемантень покш питнень максоманть кисэ, - мерсь Ромодановань енксонь эрицятнень социальной ванстомань учреждениянь прявтось Наталья Хомякова, конантень максозь «Заслуженный работник социальной защиты населения Российской Федерации» почетонь лемесь. - Течинь казнесь - те минек коллективенть, эрьва специалистэнть изнявксозо, конась венсти лезксэнь кедь сеттненень, кить понгсть эрямонь стака шкас. Минь эрьва чистэ вастовтано ломантнень стакачист марто ды бажатано сынст витемс, важодтяно минек эрицятнень лезэс».
Мордовия Республикань Прявтонь Пресс-службась