«Московсо эйзюрковонь 22-це чинь терактось аволь ансяк сайсь ламо эрямот ды кандсь зыянт Россиянь семиятнес, истя жо вельмевтсь обществасонть ламо кортамот ды кевкстемат антитеррористической ванстомадонь ды миграционной законодательствань виевгавтомадонть сеттнень коряс, кить сыть минек масторов. Терактонь анокстыцятне бажасть совавтомс коламо, явовтомс берянь мель омбо масторонь ломантненень, конат уш эрить тесэ эли бажить получамс гражданства, – тешкстызе Мордовиянь Прявтось. – Секскак тынк профессионализмась ды мелень явовтомась лездыть муемс прявт тевтнень, конатнень марто омбо масторонь эрицятне сыть Россияв ды Мордовияв».
Артём Здунов тешкстызе, те тевесь витеви ансяк ведомстватнень ютксо вейсэнь важодеманть, общественной контроленть вельде. Тешкстазель, ютазь иень невтевкстнэнь коряс куватьс шканть перть васенцеде Мордовиясо тешкстазь миграциянь аволь покш касома – 100 ломантнеде седе ламо, истя жо раськеютконь потоконть коряс. Кармась важодеме «Возвращение» республикань программась республикав сеттнень велявтовтомаст коряс, кить тусть регионстонть меельце кементь иетнень перть.
Республикасонть, кода целанек масторсонть, а сатыть кадрат ламот отраслятнесэ, важодицят эрявить инвестпроекттнэнь топавтоманть туртов. Мордовиянь 300 седе ламо юридической лицят ды башка предпринимательть тердить важодемань тевдеемантень омбо масторонь эрицят. Целанек республикасонть важодемань ресурстнэнь вейсэнь покшолмасонть омбо масторонь важодемань мигранттнэнь пельксэсь овсе аволь покш – 1% аволь седе ламо.
Координационной советэнь важодемань прявт енкстнэнь ютксо региононь руководителесь евтызе омбо масторонь важодемань виень тердемань тевенть мельга ванноманть ды регионсонть важодемань мигранттнэнь балансонь ванстоманть, рузонь келень содамонть лангс обязательной экзаменэнь максомантень покш мелень явоманть ды оформлениянть пингстэ обязательной медицинской освидетельствованиянть. Прявт тевесь - омбо масторонь студенттнэнь тердеманть ды тонавтнемань визатнень тееманть мельга ванномась (региононь вузтнэсэ тонавтнить малав 3 тежат омбо масторонь ломанть 54 мастортнэстэ - те малав эрьва кеменце студентэсь), истя жо омбо масторонь эрицятнень эйкакштнень тонавтнемань организациятнесэ тонадомась. Важодемань башка енксось – раськень-культурань автономиятнень, диаспоратнень ды землячестватнень, свалшкань религиозной конфессиятнень марто вейсэнь тевдеемась.
«Виде миграционной политикась, межнациональной сэтьмечинь ды межконфессиональной чарькодемань кемекстамось – те государственной политикань пряв енкстнэ. Теде аволь весть кортась минек Президентэсь, – тешкстызе Артём Здунов. – Ней, диверсионно-террористической тевдеемань виевгавтоманть пингстэ, те сэтьмечинь прявт лувтне. Минек республикась, эрьва кодат рейтингтнень невтевкстнэнь коряс, сови межнациональной ды межконфессиональной отношениятнень енкссо сехте сэтьме регионтнэнь юткс. Ансяк те тевесь пек човине, секскак эряви кортамс тандавкстнэде ды превентивной важодемадонть».
Координационной советэнь промксонть лувсо Госсобраниянь Председателесь Владимир Чибиркин евтнесь миграционной законодательстванть виевгавтомадонзо. Тешкстазель, весе законодательной юрось кемекстазь федеральной уровнясо ды сонзэ мельга ваны Россиянь Правительствась. Ансяк зярыя регионтнэсэ топавтовить те енкссонть эсест программасткак. Масторонь Президентэсь евтась ушодкс миграционной политикантень китнень-янтнэнь одкстомтомань эрявиксчиденть ды те енкссонть башка ведомствань теемадонть. Текень марто неень шкане РФ-нь Федеральной Собраниясь вети важодема миграционной законодательствань одкстомтоманть коряс.
Советэнь промкссонть республикань миграционной политикань эрьва кодат кевкстематнень коряс кортасть МР-нь эрицятнень социальной ванстомань, трудонь ды занятостень министрась Игорь Князьков, МР-ва МВД-нь миграциянь кевкстематнень коряс Управлениянь прявтось Борис Мандрус, МР-нь Образованиянь министрась Елена Солдатова, Н.П. Огарев лемсэ МГУ-нь ректорось Дмитрий Глушко, истя жо важодемань таркатнень максыцятне, конат тердить омбо масторонь важодемань виенть.
Мордовиянь Прявтось кармавтсь анокстамс тевдеематнень аравтлув, конат аравтозь те енкссонть тевтнень мельга ванномань виевгавтомантень. Прявтось – виевгавтомс мелень явоманть весе уровнятнесэ.
«Лувось тесэ истямо: омбо масторонь эрьва эрицясь улезэ учетсо, эрьванть миненек эряви содамс», – мерсь Артём Здунов. Текень пингстэ республикань руководителесь тешкстызе: «Ломаньсэнть миненек питней сонзэ лувось, аволь раськентень кандовомась».
Мордовия Республикань Прявтонь Пресс-службась