Ковылкинань ЦРБ-сь – республикасонть сехте покштнень ютксто вейкесь, тесэ ули натой акушерэнь стационар, конась панжозь 8 иеде икеле. Мордовиянь Прявтось ваннынзе медучреждениясонть теезь условиятнень, оборудованиянть. «Здравоохранение» нацпроектэнть лувсо ансяк мелят больницянтень явозь - компьютерной томографиянь аппарат, виев микроскоп химлабораториянть туртов, ультразвуковой исследованиянь туртов оборудования, реанимациянь отделениянть туртов система. Тедеде тесэ ушодовсь хирургиянь корпусонь педе-пев витнемась – тевтне истя жо ветявить нацпроектэнть лувсо. Ковылкинань ЦРБ-сэ витнемань весе пелькстнэ ды оборудованиянь одкстомтомась – регионсонть шумбрачинь ванстомань системань одкстомтомань пелькс, конась аравтозь Ковылкинань енксонь ды маласо аштиця муниципальной образованиятнень эрицятненень явовиця медицинань лезксэнь вадрячинь кастомантень.
Ковылкинань ЦРБ-нь чачтамонь отделениясонть теезь 12 таркат. Иенть перть тесэ чачтасть 68 ават (42 – райононь эрицят, 13 – лия ошонь ды зяро жо республикань лия районтнэнь эрицятне). Те невтевксэсь 62% седе аламо 2019 иенть коряс – сестэ отделениянь специалисттнэ примасть 182 чачтомат. Отделениясонть важодить аволь ансяк врач акушер-гинеколог ды акушеркат, истя жо врач неонатолог.
Мордовиянь Прявтось, больницянь медицинань персоналонть марто кортамсто, тешкстызе: райононь эрицятненень целанек явовозо медицинань вадря лезксэсь. Текень марто, сеедьстэ медицинань персоналонть сатышка практикань аразьчинть пингстэ майси явовиця услугань вадрячись. Прявт тевесь, конань эряви витемс, – кода теемс истя, штобу эрицятнень медицинань обслуживаниянть пингстэ, ванстомс сонзэ покш уровнянтькак.
Теке чистэнть Артём Здунов ульнесь Инсаронь райононь больницясонть, тей кандовить 10 тежадо седе аламо эрицят. 2020 иестэнть саезь тей кандовиця пациенттнэ киртявсть малав 15%. Стационарсонть теезь 38 таркатне малав пель ие аштесть «учомань» лувсо. Те сюлмавозь сень марто: 60% тевтнень пингстэ Инсаронь эрицятне пшкалить квалифицированной, истя жо покш технологичной медицинань лезксэнть мельга райононть томбалев.
Истя жо тешкстазель, апак вано амбулаториясо сатышка кадратнень лангс, ютазь иенть коряс аволь целанек топавтозь невтевкстнэ профилактикань, диспансерной ванноматнень, орматнень коряс пшкадематнень коряс. Ламосо те сюлмавозь зярыя узкой специалисттнэнь аразьчист марто.
Республикань Минздравонь важодемань группатне ды территориальной ФОМС-сь домкасто ваннызь тевенть. Мельтнень-арсематнень ютксо – райононь ЦРБ-тнесэ узкой специалисттнэнь бригадатнень дежурстватнень анокстамось «вахтань лувсо» – кемень-кемень чить, сынь кармить эрямо районтнэсэ, те лезды ванстомс медицинань лезксэнь явомань доступностенть ды вадрячинть.
Коллективтнень марто вастовоматнесэ Мордовиянь Прявтось покш мель марто кунсолынзе весе арсематнень – медиктнень, районтнэнь эрицятнень, шумбрачинь ванстомань енксонь организатортнэнь муниципальной образованиятнень прявттнэнь.
Артём Здунов тешкстызе, кортавиця кевкстематне пек эрявить кода пациенттнэнь, истя жо медицинань персоналонть туртов, секскак весе решениятне улить кемекстазь весе енкстнэнь мелест-ванновтост кирдезь. «Куш-кодат решениятнень кемекстамодо икеле – кунсолосынек весень, секскак минь течи тесэ – шумбрачинь ванстомань министранть марто вейсэ!» – тешкстызе региононь Прявтось. Эсь ванновтонзо Артём Здунов евтызе – медицинань лезксэсь кадовозо таркатнесэ эрицятнень туртов эрявикс покшолматнесэ – первичной диагностикась ды лецямось, лабораториянь ванноматне, диспансеризациясь, профилактикась.
Башка кортась Ковылкинань ЦРБ-сэ чачтомань отделениянь важодеманзо коряс: «Аватнень, конатнень арась стакачист ды Саранскоень врачтнэнень, Перинатальной куншкакурос пшкадемань коряс башка невтевксэст, улест возможностест ютамс ваннома ды чачтамс тиринь стенатнесэ – тесэ пек питней малавикстнэнь кирдемась».
Артём Здуновонь ванновтонзо коряс, авань шумбрачинтень эряви явомс башка мель, истя жо, шумбрачинь ванстомань первичной звенасонть – тень эйстэ ламосо аштить демографиянь невтевкстнэ, конат пек эрявить региононь виевгавтоманть туртов. Инсаронь больницянь медперсоналонь энялдоматнень коряс маласо шкастонть учреждениянтень максови маммограф профилактикань эрявикс важодемань ютавтоманть туртов.
Райононь ЦРБ-тнень важодемань ладямонь кевкстематнень коряс маласо шкастонть ютавтови минздравонь коллегиянь промкс. «Кортасынек весементь эште весть специалисттнэнь марто, тердсынек райононь врачтнень ды приматано решения, конась лади весенень. Экономикань пельксэсь, шумбрачинь ванстомань учреждениятнень важодемань лезэвчись, врачтнень квалификацияст ванстомась – эрявить, ансяк васняяк минек талновты ломантнень ежост», – мерсь Артём Здунов ды евтась сюкпря вастовоматнень весе участниктненень кортамонть кисэ.
Мордовия Республикань Прявтонь пресс-службась