Сон тешкстызе, те недлястость федеральной уровнясонть ютавтовсть кризисэнь а нолдамонь мероприятият: Россиянь Президентэсь ютавтсь промкс агропромышленной комплексэнь виевгавтоманть коряс, истя жо правительствасонть кемекстазь зярыя решеният строямонь отраслянтень, вишка ды средней бизнесэнтень, промышленностентень лездамонть коряс.
«Ней нежедькс тееви импортонь полавтоманть лангс. АПК-сонть те велень хозяйствань техникань производствась, видьметнень куншкакуронть тевдеемась. Полавтови АПК-нть виевгавтомань стратегиясь. Секскак кармавтан весе ответственнойтненень пштистэ ваномс: кодат ярмакт ды мезе лангс явовить, мезе тень эйстэ мереви явовтомс республикав. Тесэ эряви министерстватнень ды ведомстватнень федеральной центранть марто вейсэнь важодемась. Прявтось, теевельть важодемань таркат, топавтовольть тевтне, конатнень путы масторонь Правительствась», – тешкстызе Артём Здунов.
Региононь Экономикань, микшнемань ды предпринимательствань министрась Алексей Грибанов евтнесь республикань экономикань секторсонть тевтнень ладямонь коряс кризисэнь а нолдамонь тевтнень омбоце пакетэнть топавтомадонзо. Ней ветяви важодема инвестпроекттнэнень вешематнень киртямонть коряс (путовкстнэнь (вложениятнень) покшолматнень пелькссэнть). Теде башка, совавтовить полавтомат налогообложениянь шождалгавтозь системанть коряс законодательствантень. Арсеви 2024 иенть самс поладомс налогонь пандыцятнень регистрациянь льготань шканть. Теде башка, министерствась невтизе Предпринимательствантень лездамонь фондонть пельде кшинь пидицятненень-паницятненень лездамонть туртов кредитэнь од продуктонть.
«Кредитэнь каникулатнень» максомадост пшкадсть региононь МСП-нь 184 субъектт, Мордовиянь предпринимательствантень лездамонь фондось явсь истямо лезкс бизнесэнь эште 71 субъектэнтень. Банктнень льготань кредитованиянь программатнень коряс вишка предприятиятнень пельде каязь 95 яволявтомат», – евтнесь ведомствань руководителесь.
Мордовиянь Велень хозяйствань ды продовольствиянь министрась Александр Кечайкин евтнесь, регионсонть велень хозяйствань продукциянть лангс покш вешеманть коряс тевтнень ладямонь енкссонть топавтови 21 инвестиционной проект, финансированиянь вейсэнь покшолмась – 30 млрд ламо целковойть. Тедеде арсеви теемс важодемань малав 300 таркат.
Видемань кампаниянтень анокстамонть лувсо те ковстонть велень хозяйствань отраслянтень явозь субсидият 70 млн целковойтнень покшолмасо, анокставить документт чадыковсто эште 700 млн целковойтнень явомадост.
Александр Кечайкин тешкстызе, республикасонть киртявсь покш вешемась ярсамопелень продукциянь весе видтнэнь лангс. Важодить оймсема чинь ярмункат, льготань питнетнень коряс продукциясь миеви эсенек товаронь производительтнень микшнемань сеттнесэ.
Мордовия Республикань Эрицятнень социальной ванстомань, важодемань ды занятостень министрась Игорь Князьков пачтясь, ламолгадсть эрицятне, конат вешнить сезононь важодемань таркат. Мордовиянь предприятиятнесэ ды организациятнесэ ламо важодемань таркатнень олякстомадо яволявтомат эзть каяво. Ней ветяви ероков тевдеема занятостень весе енкстнэнь коряс, конат сюлмавозь господдержкань явоманть марто: эрицятнень нурька шкань занятостенть, общественной тевтнень топавтомаст туртов важодемань таркатнень тееманть, специалисттнэнь одс тонавтоманть коряс.
Мордовия Республикань Прявтонь пресс-службась