Сонзэ топавтомадонзо пачтясь МР-нь экономикань, микшнемань ды предпринимательствань министрась Алексей Грибанов. Васенце кварталонтень аравтлувсонть – 48 мероприятият, важодемась моли графикенть коряс, ансяк вете пункттнэнь коряс тешкстазь топавтомань шкатнень эйстэ кадовомась. Республикань Прявтось домкасто кортась эрьвадонть.
Прявт кевкстематнеде вейкесь – Саранскоень закредитованностесь. Ледстясынек, Мордовиянь Прявтонь Кучомасонть кармавтозь кемекстамс Саранск ошонь округонь муниципальной финанстнэнь шумбралгавтомань программанть – доходтнэнь кастоманть ды долктнень киртямонть туртов.
Эште вейке прявт енксось – строямонь апак прядо объекттнэнь киртямось. Кучомасонть Правительствантень кармавтозь ютавтомс инвентаризациянть, пурнамс реестра ды анокстамс неть объекттнэнь коряс важодемань аравтлув. Сынст ютксо – Кочкурбуень енксонь Вирь Тавла велесэнть соксонь базась. Артём Здунов сялдызе Экономикань министерствань те объектэнть коряс важодеманть: «Мекс соксонь базась ванновтомо колмо ковт? Телесь ютась, объектэсь судонок ало. Мекс тосо мезеяк а тееви?»
Республикань Прявтось кармавтсь министратненень виевгавтомс важодеманть строямонь апак прядо объекттнэнь коряс.
Кортамось истя жо мольсь республикань районтнэсэ рекреационной таркатнень, ков истя жо совить укшномань ды калонь кундсемань туртов таркатне, вадрялгавтомань коряс тевтнень анокстамодост.
Неть таркатнень вадрялгавтоманть арсеви топавтомс «Туризм и индустрия гостеприимства» нацпроектэнть лувсо федеральной лезксэнть вельде. Республиканть пельде Ростуризмав кучозь туризмань коряс предпринимательтнень ушодкстнэнень грантонь лезксэнь явомань коряс яволявтоматнень пакет.
«Весемезэ арсеви явовтомс 220 млн ламо целковойть», – тешкстызе МР-нь экономикань, микшнемань ды предпринимательствань министрась Алексей Грибанов.
Теде башка, промкссонть кортасть Мордовиянь социально-экономической виевгавтомань вете иень индивидуальной программань топавтомадонть. Ледстясынек, 2026 иенть самс республикантень федеральной бюджетстэ эрьва ие башка кармить явомо 1 млн целковойть. Программань топавтомась лезды одс нолдамс «Лисма» заводонь производствань вийтнень, теемс сонзэ юрсо промышленной парк. Истя жо арсеви топавтомс промышленностень виевгавтомань ды предпринимательствантень лездамонь республикань фондтнэнь докапитализациянть, «Рузаевка» ТОСЭР-нь виевгавтоманть ды Мордовиянь госуниверситетэнть юрсо научной лабораториятнень тееманть.
Мордовиянь Прявтонь Кучоманть топавтомань коряс республикань Правительстванть 2022 иентень тевдеемань программантень совавтозь 500 ламо мероприятият. Сынст топавтомань коряс ванномась карми ветявомо свалшкань лувсо.
Мордовия Республикань Прявтонь пресс-службась