Чаунзань енксонь прявтось Руслан Батеряков евтнесь республикань Прявтонтень ды Правительствань члентнэнень, кода моли территориянть виевгавтомань аравтлувонь невтевкстнэнь топавтомась. Вадря динамика марто важодить АПК-нь ды промышленностень предприятиятне. Истя, те иень ниле ковтнень перть саразонь алонь производствась кармась – 108 млн штукат – 120% ютазь иень теке шкантень. Тувотне ламолгавтозь 11%. 2022 иень 1 кварталстонть АПК-нь предприятиятнесэ ютазь иень теке шканть коряс зарплатась кассь 17% ды кармась 41 тежадо седе ламо целковойть.
«2022 иестэнть арсеви топавтомс инвестициянь 6 проектт, тевс нолдавить 2,2 млрд целковойть ды теевить 194 важодемань таркат», – тешкстызе Чаунзань енксонь прявтось.
Якшамковсто-чадыковсто эсест доходтнэнь пачтямонь покшолматнень коряс аравтлувось топавтозь 140%. Эрязасто моли нацпроекттнэнь топавтоманть лувсо социальной объекттнэнь строямось ды витнемась. Республикань Прявтось явсь покш мель сень лангс, кода моли Комсомольский поселкасонть поликлиникань педе пев витнемась ды каладозь кудотнестэ одс эрицятнень ютавтомась. «Программась а сезеви?» – кевкстизе Артём Здунов райононь прявтонть.
«Арась, важодемась моли аравтлувонть коряс», – кемевтсь Руслан Батеряков.
Промкссонть истя жо тешкстазь райононь пшти кевкстематне. Васняяк – те ведень пачтямось ды китнень витнемась. Комсомольский поселкасонть «Цементник» Культурань кудось, конань умок уш эряви витнемс, – совась 2023 иентень «Комплексное развитие сельских территорий» программантень. Теде башка, программанть лувсо поселкасонть арсеви строямс ванськавтомань сооруженият, кить, бассейна.
Руслан Батеряков истя жо тешкстызе, райононь эрицятне учить Чаунзань ДК-нь витнеманть ды Комсомольский поселкасонть Эень дворецэнь педе пев витнеманть. Мордовиянь Прявтось макссь кармавтома Правительствантень ванномс возможностенть маласо иетнестэ совавтомс неть объекттнэнь федеральной программатнес.
Мордовия Республикань Прявтонь пресс-службась