Изнямонь Чись питней аволь ансяк ветерантнэнень – те весе масторонь кенярксчи, сон максы гайть минек масторонь эрьва эрицянть седейсэ, вишкинетнестэ саезь покштнень видьс. Секскак, кода свал, мероприятиятне кармить ютавтовомо эйкакштнень улемаст марто. Кода тешкстызе васенце вице-премьерэсь Галина Лотванова, панжиковонь 6-це чистэнть саезь весе республикань келес образованиянь организациятнесэ ютавтовить «Разговоры о важном» уроктне, ламо лия патриотической мероприятият. «Бессмертный полк» акциясь ютавтови онлайн-лувсо.
Муниципальной весе образованиятне ней ванськавтыть ды вадрялгавтыть территориятнень. Республикань Прявтось кармавтсь куроксто прядомс неть тевтнень, явомс башка мель кеврунготненень ды калмо ланготненень.
Саранск ошонь прявтось Игорь Асабин пачтясь, мезе тееви ошонь куротнень, площадтнень, сквертнэнь, парктнень, кеврунготнень вадрялгавтомань-мазылгавтомань коряс. Чадыковонь 1-це чистэнть саезь Саранск ошонь округсо ушодовсь «Чистый город» акциясь. Эрьва чистэ куротнень ванськавтомо лисить китнень лангсо 200 седе ламо важодицят, истя жо местной самоуправлениянь, муниципальной предприятиятнень, управляющей компаниятнень, общеобразовательной ды спортивной учреждениятнень, шумбрачинь ванстомань, культурань учреждениятнень, коммерческой предприятиятнень сотрудниктне ды ошонь эрицятне. Чадыковонь 27-це чистэ Саранск ошонь округсо ютавтовсь Весероссиянь субботник.
Ине Отечественной войнасо Изнямонь 79-це иетнень тешкстамонтень алтазь кенярксчинь мероприятиятнень ютавтомань шкасто общественной сэтьмечинь ванстоманть ды террористической тандавкстнэнь а нолдамонть коряс кемекставить эрявикс тевть ламо ломанень пурнавомань таркатнесэ общественной порядоконь ды общественной сэтьмечинь топавтоманть коряс.
Изнямонь Чинь тешкстамонтень алтазь кенярксчинь мероприятиятнень ютавтомань шкасто эрицятнень сэтьмечист топавтоманть ды китнень ланга ардомань ладямонть туртов Саранск ошонь округсо панжиковонь 8-це ды 9-це читнестэ башка китнень лангсо нурька шка лоткавтови транспортонь ардомась, автомобильтнень лоткамось ды путомась.
Мордовия Республикань Прявтонь пресс-службась