Чадыковонь 16-це чистэ Мордовиянь Прявтонть тевтнень топавтыцясь Артём Здунов ютавтсь важодемань вастовома МР-ва Россиянь МЧС-нь ГУ-нь прявтонть Андрей Наумов марто. Кортамось мольсь чадыведень коряс тевтнеде ды республикасонть противопожарной режименть кемекстамодо.
Андрей Наумов пачтясь Прявтонть тевтнень топавтыцянтень, чадыведенть коряс тевтне аштить ванновт ало. Апак вано икелень берянь арсематнень лангс, ней специалисттнэ кемема марто кортыть, ведесь таркань-таркань кармась потамо.
Пси пертьпельксэнть вельде эрьва чистэ редявить кирваземат весе региононть келес. Тешкстазь истят тевть, зярдо толось пачкодекшнэсь эрямо кудотнень малав. Чадыковонь 15-це чистэ толонь мадстемань бригадатне 130-ксть тердезельть истят кирвазематнень мадьстеме. Ды свал зыянов тевтнесэ чумокс ульнесть ломантне. Меельце недлястонть неть кирвазематнень мадьстеме теезь 400 ламо ардомат.
Тешкстазь постановления Мордовиясо кирвазематнень а нолдамонь режименть кемекстамодо. Сон сови вийс чадыковонь 17-це чинь 00.00 чассто. Те режименть шкасто кавксть покшолгавтовить штрафтне кирвазематнень а нолдамонь коряс правань коламотнень кисэ, а МЧС-ть лангс путовить башка полномочият.
Оперативной штабсонть, конась ютавтовсь икеле, Артём Здунов кармавтсь муниципальной районтнэнь прявттнэнень явомс мель коське тикшенть кирвазематнень лангс ды кармавтсь кемекстамс тевть пожартнэнь а нолдамга.
Мордовия Республикань Прявтонть пресс-службась