Умарьковонь 2-це чистэ Мордовиянь Прявтонь тевтнень топавтыцясь Артём Здунов ютавтсь важодемань вастовома Индиясто делегациянть марто, конань прявтсо Россиянь Федерациясо Индия Республикань Чрезвычайной ды Полномочной Посолось Д.Б. Венкатеш Варма. Сынь кортасть зярыя ёнкссо вейсэнь важодемадо - велень хозяйствасо, фармацевтикасо ды медицинасо, спортсо ды школасо тонавтницятнень - раськеютконь олимпиадань движениянь участниктнень анокстамодост.
Россиянь Федерациянь регионтнэнь ды Индия Республикань вейсэнь важодемань эрявиксчиденть яволявтсть Россиянь Президентэсь Владимир Путин ды Индиянь премьер-министрась Наренда Моди 2018 иень ожоковсто Нью-Делисэ эрьва иень 19-це саммитэнть ютавтомсто. Макссть покш питне Россиянь регионтнэнь ды Индиянь штаттнэнь ютксо вейсэнь важодемань енкстнэнь ламолгавтомантень.
Артём Здунов, омбо масторонь инжетнень марто шумбракстнемстэ, евтась сюкпря Россиянь Федерациясо Индия Республикань Чрезвычайной ды Полномочной Посолонтень покш делегациянь самонть кисэ, ков совасть промышленностень, велень хозяйствань, фармацевтикань ды банконь тевень представительтне.
"Мордовиянь экономикань малав 30% - промышленностесь, 15% - велень хозяйствась. Те тешксты минек сюлмотнень, истя жо микшнемань, Индиянть марто. Минь явовтанок тынк меленк ярсамопелень переработканть, светотехникань продукциянть ды оптической волокнанть лангс. Мордовиянь партнёртнэнь ютксто 64 масторт. Республикась нолды аволь ансяк эсензэ туртов, истя жо пачти сывель, ловсо, алт, саразт. Минек ули меленек ладямс экспорт Индияв, - мерсь МР-нь Прявтонь тевтнень топавтыцясь. - Истя жо явтанок покш мель оптической волокнань нолдамонтень ды миемантень. Россиянь келес сонзэ нолдатанок ансяк минь. Содатанок, Индиясо покш мель явови интернетэнь виевгавтомантень, улить тень коряс масторонь прявт руководствань кармавтомат. Минек ули меленек кармамс поставщикекс ды кирдемс конкуренция лия компаниятнень марто".
Региононь руководителесь истя жо тешкстызе фармацевтикань коряс Индиянь марто вейсэнь важодемань кевкстеманть. Сонзэ валонзо коряс, фарминдустриянь лидертнэнь ютксто вейкенть марто партнеронь сюлмотнень ладямось лезды кавто ёнкстнэсэ виевгавтомс отраслянть.
Венкатеш Варма евтась сюкпря Артём Здуновнень лембе вастоманть кисэ ды тешкстызе, Индиянь делегациясь редизе ялгаксчинь ежонть эрзянь-мокшонь модань лангсо васенце минутатнесэ улемстэ. "Сюкпря, явтадо миненек шка, апак вано пандемиянть ды покш занятостенть лангс. Минь кенярдтанок, лиссь возможность самс Мордовияв ды ютавтомс зярыя мероприятият. Пачтян шумбракстнемань ды сюкпрянь валт региононь руководителентень, Правительствантень ды республикань весе эрицятненень", - мерсь Чрезвычайной ды Полномочной Посолось. Сон истя жо мерсь, вастовомась ютавтови Федерациянь Советэнь раськеютконь тевтнень коряс комитетэнь председателень васенце полавтыцянть Сергей Кисляконь лезксэнзэ вельде, сон истя жо ульнесь вастовомасонть.
Посолось тешкстызе, Мордовиянь ды Индиянь ютксо уш улить вейсэнь важодемань башка енкст, те электроникась, чувтонь переработкась, металлургиясь ды велень хозяйствась. Мелят, невтемакс, аволь органической химической продукциянь экспортось кассь зярыяксть. Ламо арсемат АПК-нь коряс. "Минь нейтяно региононь покш прогресс те енкссонть. Нейтяно покш потенциал ярсамопелень переработкань, сывелень ды алонь производствань коряс вейсэнь важодемасонть", - мерсь сон.
Кортамось мольсь фармацевтикань коряс арсематнеде. Омбо масторонь инжетнень туртов пек мельстуицякс марявсь кабелень промышленностесь.
Башка кортамо ветявсь высшей образованиянть коряс. Н.П.Огаревонь лемсэ МГУ-со омбо масторонь студенттнэнь ютксто малав 20% - Индиянь эрицят, те 425 ломанть. Ламот эйстэст тонавтнить медицинань институтсо. Эштё малав сядо ломанть кармить тонавтнеме те иень таштамковонь 1-це чистэнть. Ёвтазель мель анокстамс Индиянь студенттнэнь туртов англань келень курсат лия специальносттнень коряскак. Истя жо кортасть Саранскойсэ IT сферань коряс Индиянь тонавтыцятнень пельде курсатнень ютавтомадост.
Ламо шка явозель школасо тонавтомань виевгавтомантень. Ёроков эйкакштнень туртов республикань лицеень виевгавтомань коряс прявтонь полавтыцясь, научной руководителесь, общественной ушодкстнэнь коряс МР-нь Прявтонь советникесь Дмитрий Подлесный явсь мель, школань башка предметтнэнь коряс Индиянь раськень сборнойтне - масторлангонь келес сехте виевтнестэ вейкетне. Россиянь башка сборнойтнень нежекс аштить ёроков эйкакштнень туртов республикань лицеень воспитанниктне. Сон евтась мель вейсэндямс вийтнень сы шкань чемпионтнэнь анокстамост коряс ды ютавтомс вейсэнь сборт. Венкатеш Варма мерсь, те кевкстемась домкасто ваннови Индия Республикань Правительстванть марто. Теде башка, инжетнень ули мелест тонавтнемс Саранскойсэ лицеень теемань опытэнть ды нолдамс тевс сонзэ эсест масторсо.
Кортамотнеде мейле делегациясь тусь Индиянь студенттнэнь марто вастовомантень. Уш ванды, умарьковонь 3-це чистэ, ветявить кортамот промышленностень, велень хозяйствань ды фармацевтикань компаниятнень представительтнень марто.
Мордовия Республикань Прявтонь пресс-службась