Артём Здунов эйзюрковонь 6-це чистэ важодемань содавтома марто сась Беларусь Республикав. Минскойсэ Мордовиянь руководителесь ютавтсь зярыя важодемань вастовомат.
Беларусь Республиканть ды Мордовиянть улить ялгаксчинь ды деловой умонь сюлмост, минек ули микшнемань-экономикань, научно-технической ды культурань енкссо вейсэнь тевдееманть коряс Межправительственной вейсладямо.
Беларусь Республикась - Мордовиянь микшнемань покш партнёртнэстэ вейкесь. Белоруссиянть марто микшнемань-экономикань сюлмот кирдить Мордовиянь 60 седе ламо предприятият. Республикась рамси белоруссиянь производительтнень кедьстэ велень хозяйствань, строямонь ды китнень техниканть, пачти продукция, конась нолдави региононь предприятиятнесэ.
Мордовиясь бажи седе тов кемекстамс вейсэнь важодеманть, виевгавтомс кооперациянь сюлмотнень, нолдамс вейсэнь проектт. Ледстясынек, 2025 иень ожоковсто Белоруссиясо Мордовия Республикань бизнес-миссиянть лувсо тешкстазь вейсэнь тевдеемадо вейсладямо Брестэнь электроламповой заводонть ды А. Н. Лодыгинэнь лемсэ НИИИС-нть, «Лидер-Компаундонть» ды «Полимир» заводонть, «Станкостроителенть» ды Осиповичень транспортонь машиностроениянь заводонть, Мордовиянь Технопарконть ды Белоруссиянь интеллектуальной ули-паронь Национальной куншкакуронть ютксо.
Минскойсэ ютавтовсь Мордовиянь Прявтонть Беларусь Республикань шумбрачинь ванстомань министрань полавтыцянть Александр Старовойтов марто вастовомась. Кортавсть фармацевтикань отраслясонть вейсэнь тевдеемань виевгавтомань кевкстематне. Кортамось мольсь «Промомед» фармкомпаниянть пельде Беларусев лекарствань препараттнэнь пачтямонь варианттнэде, «Белмедпрепараты» производственной площадкасонть минек препараттнэнь «пешксе циклань» схеманть коряс локализациянь возможносттенть, истя жо сахарной диабетэнь лецямонь од лувтнень коряс Белоруссиянь шумбрачинь ванстомань специалисттнэнь туртов тонавтомань семинартнэнь ютавтомадост.
Истя жо ульнесть вастовомат Белоруссиянь кавто покш предприятиятнень прявттнэнь марто - Брестэнь электроламповой заводонть ды «Атлант» бытовой техникань заводонть. Кортавсть промышленной кооперациянь кемекстамонь кевкстематне. Кавонест предприятиятне важодить А. Н. Лодыгинэнь лемсэ НИИИС-нть марто – сон нолды продукция, конась лади раськеютконь сехте покш стандарттнэнень.
Мордовия Республикань Прявтонь Пресс-службась